- నావ తిరగబడటంతో ప్రమాదం
- ఇద్దరు యువకులు సురక్షితంగా బయటపడటం
- మూడో వ్యక్తి కోసం ఉత్కంఠ
- భయంతో పారిపోయిన స్నేహితులు
- స్థానికుల అప్రమత్తతతో పోలీసులకు సమాచారం
- ఎస్ఐ వెంకయ్య పర్యవేక్షణలో గాలింపు
- గజ ఈతగాళ్ల సహకారం
- రిజర్వాయర్ వద్ద కలకలం
- వాహనం ఆధారంగా దర్యాప్తు
- గల్లంతైన యువకుడి ఆచూకీ కోసం శోధన
నావ ప్రమాదం… ఇద్దరు ప్రాణాలతో బయటపడి, మరో యువకుడు గల్లంతు—సూరంపాలెం రిజర్వాయర్ వద్ద ఉత్కంఠభరిత గాలింపు చర్యలు కొనసాగుతున్నాయి.
గంగవరం, పెన్ పవర్ మార్చి 26:
సూరంపాలెం రిజర్వాయర్ వద్ద నావ ప్రమాదంలో ఒక యువకుడు గల్లంతైన ఘటన కలకలం రేపింది. సమాచారం అందుకున్న వెంటనే గంగవరం పోలీసులు గాలింపు చర్యలను ముమ్మరం చేశారు. బుధవారం సాయంత్రం ముగ్గురు యువకులు ద్విచక్ర వాహనంపై వచ్చి రిజర్వాయర్లో నావలోకి వెళ్లినట్లు తెలిసింది. అయితే ప్రమాదవశాత్తు నావ తిరగబడడంతో ఇద్దరు యువకులు ప్రాణాలతో ఒడ్డుకు చేరుకోగా, మరో వ్యక్తి నీటిలో కనిపించకుండా పోయాడు.భయంతో ఒడ్డుకు చేరుకున్న ఇద్దరు యువకులు అక్కడి నుంచి పరారైనట్లు సమాచారం. ఈ ఘటనను గమనించిన స్థానిక యువకులు వెంటనే పోలీసులకు సమాచారం అందించారు. దీంతో గంగవరం ఎస్ఐ వెంకయ్య సంఘటనా స్థలానికి చేరుకుని విచారణ చేపట్టారు. గురువారం ఉదయం నుంచి గజ ఈతగాళ్ల సహాయంతో రిజర్వాయర్లో విస్తృతంగా గాలింపు చర్యలు కొనసాగిస్తున్నారు.యువకులు వచ్చిన ద్విచక్ర వాహనం ఘటన స్థలంలోనే వదిలివెళ్లడంతో, ఆ వాహనం ఆధారంగా పోలీసులు విచారణ ప్రారంభించారు. వాహనం నెల్లిపూడి ప్రాంతానికి చెందినదిగా గుర్తించినట్లు సమాచారం.
.