రిజర్వేషన్లు, రాజకీయ ప్రాతినిధ్యంపై కాపుల ఒత్తిడి పెరుగుతోందా..?
తూర్పుగోదావరి మహాగర్జనతో రాజకీయ వేడి
వైసీపీపై నమ్మకం కోల్పోయిన కాపు వర్గాలు రిజర్వేషన్ల డిమాండ్
మళ్లీ కేంద్రబిందువుగా పవన్ కళ్యాణ్పై కొనసాగుతున్న సామాజిక వర్గ ఆశలు
నామినేటెడ్ పదవులు, రాజకీయ వాటాపై ఒత్తిడి
కాపు ఉద్యమాలను కూటమి ఎలా స్వీకరిస్తుందో చూడాలంటున్న మేధావులు
రెండేళ్ల కూటమి పాలన తర్వాత కాపు సమాజం తమ హక్కులు, హామీల అమలుపై స్వరం పెంచుతోంది. తూర్పుగోదావరిలో జరిగిన కాపుల మహాగర్జన సభ రాష్ట్ర రాజకీయాల్లో కొత్త చర్చకు దారితీసింది. వైసీపీపై విశ్వాసం కోల్పోయిన కాపు వర్గాలు ప్రస్తుతం కూటమినే ప్రత్యామ్నాయంగా చూస్తున్నప్పటికీ, తమకు రాజకీయంగా, సామాజికంగా మరింత ప్రాధాన్యం కల్పించాలని ప్రభుత్వానికి స్పష్టమైన సందేశం ఇస్తున్నట్లు విశ్లేషకులు భావిస్తున్నారు.
స్టేట్ పొలిటికల్ బ్యూరో పెన్ పవర్ విజయవాడ, జూన్ 12 :
ఆంధ్రప్రదేశ్ రాజకీయాల్లో మరోసారి కాపు సామాజిక వర్గం చర్చనీయాంశంగా మారుతోంది. రాష్ట్రవ్యాప్తంగా తమ సమస్యల పరిష్కారం కోసం కాపు సంఘాలు ఉద్యమాలకు సిద్ధమవుతున్న సంకేతాలు కనిపిస్తున్నాయి. ఇటీవల తూర్పుగోదావరి జిల్లాలో నిర్వహించిన కాపుల మహాగర్జన సభ రాజకీయ వర్గాల్లో ఆసక్తికర చర్చకు దారితీసింది. ఈ సభను కేవలం సామాజిక కార్యక్రమంగా కాకుండా కూటమి ప్రభుత్వానికి ఒక హెచ్చరిక సంకేతంగా పలువురు విశ్లేషకులు అభివర్ణిస్తున్నారు. గత ఎన్నికల సమయంలో కాపు ఓటు బ్యాంక్లో గణనీయమైన మార్పులు చోటుచేసుకున్నాయి. ఒకప్పుడు వైసీపీకి మద్దతుగా నిలిచిన కాపు వర్గాలు, కాలక్రమేణా ఆ పార్టీపై అసంతృప్తి వ్యక్తం చేశాయి. ముఖ్యంగా రిజర్వేషన్ల అంశంలో వైసీపీ ప్రభుత్వం స్పష్టమైన చర్యలు తీసుకోకపోవడం, కాపు వర్గాలకు అనుకూలంగా భావించిన కొన్ని నిర్ణయాలను రద్దు చేయడం వంటి పరిణామాలు ఆ సామాజిక వర్గాన్ని దూరం చేశాయని రాజకీయ పరిశీలకులు చెబుతున్నారు.
చంద్రబాబు నాయుడు ముఖ్యమంత్రిగా ఉన్న సమయంలో కాపులకు ఆర్థికంగా వెసులుబాటు కల్పించే విధంగా ఈబీసీ కేటగిరీలో 5 శాతం రిజర్వేషన్లు కల్పించారు. అయితే తదనంతరం అధికారంలోకి వచ్చిన వైసీపీ ప్రభుత్వం ఆ నిర్ణయాన్ని కొనసాగించలేదు. దీంతో కాపు వర్గాల్లో అసంతృప్తి మరింత పెరిగింది. ప్రస్తుతం అదే అంశం మళ్లీ చర్చకు వస్తోంది. ఇక జనసేన అధినేత, ఉప ముఖ్యమంత్రి పవన్ కళ్యాణ్ కాపు సామాజిక వర్గానికి ప్రధాన రాజకీయ ఆశాకిరణంగా మారారు. పవన్ నాయకత్వంపై విశ్వాసం ఉంచిన కాపు వర్గాలు కూటమి ప్రభుత్వంపై కూడా ఆశలు పెట్టుకున్నాయి. అయితే రెండేళ్ల పాలన పూర్తవుతున్న నేపథ్యంలో తమకు ఇచ్చిన హామీలు, రాజకీయ ప్రాధాన్యం, రిజర్వేషన్ల అంశాల్లో స్పష్టత కావాలని కోరుతున్నాయి. ప్రస్తుతం జరుగుతున్న కాపు గర్జనలు, సమావేశాలు కూటమి ప్రభుత్వాన్ని వ్యతిరేకించేందుకు కాకుండా తమ సమస్యలను గుర్తు చేయడానికి చేస్తున్న ప్రయత్నాలుగా కనిపిస్తున్నాయి. కాపు సమాజానికి రాజకీయంగా మరింత ప్రాధాన్యం కల్పించాలని, నామినేటెడ్ పదవులు, ఎమ్మెల్సీ, రాజ్యసభ అవకాశాల్లో తగిన వాటా ఇవ్వాలని డిమాండ్లు వినిపిస్తున్నాయి.
అదే సమయంలో రిజర్వేషన్ల అంశంలో కొత్త మార్గాలను అన్వేషించే అవకాశం ఉందన్న చర్చ కూడా రాజకీయ వర్గాల్లో సాగుతోంది. గతంలో అమలులో ఉన్న 5 శాతం ఈబీసీ రిజర్వేషన్లకు మించి మరింత ప్రయోజనాలు కల్పించే అవకాశాలను ప్రభుత్వం పరిశీలించవచ్చని ప్రచారం జరుగుతోంది. అయితే దీనిపై అధికారిక ప్రకటన మాత్రం వెలువడలేదు. రాజకీయంగా చూస్తే కాపు వర్గాలకు ప్రస్తుతం కూటమి ప్రధాన ఆశ్రయంగా కనిపిస్తోంది. వైసీపీపై ఉన్న అపనమ్మకం ఇంకా కొనసాగుతున్న నేపథ్యంలో కాపు నాయకత్వం తమ డిమాండ్ల సాధన కోసం కూటమి ప్రభుత్వంపైనే ఒత్తిడి పెంచే వ్యూహాన్ని అనుసరిస్తున్నట్లు తెలుస్తోంది. రాబోయే రోజుల్లో కాపు ఉద్యమాల తీవ్రత, వాటిపై ప్రభుత్వం తీసుకునే నిర్ణయాలు రాష్ట్ర రాజకీయాల్లో కీలక ప్రభావం చూపే అవకాశాలు కనిపిస్తున్నాయి. కాపు సమాజం ఆశలను నెరవేర్చడంలో కూటమి ఎంతవరకు విజయవంతమవుతుందన్నది ఇప్పుడు రాజకీయ వర్గాల్లో ఆసక్తికర చర్చగా మారింది.