క్రోధి నామ సంవత్సర ఉగాది వేడుకలు మంగళవారం వాడవాడలా ఘనంగా నిర్వహించారు. వేకువ నుంచే పవిత్ర స్నానాలు ఆచరించి నూతన వస్త్రాలు ధరించి కుటుంబమంతా ప్రత్యేక పూజలు చేశారు. షడ్రుచులతో కూడిన ఉగాది పచ్చడిని తిని ఆనందం పొందారు. గ్రామ పురోహితుల సూచనల మేరకు రైతులు ఏరువాక చేపట్టి నూతన పంట సాగుకు శ్రీకారం చుట్టారు. అలాగే రైతుల కుటుంబ సభ్యులు వారి వ్యవసాయ క్షేత్రాలను సందర్శించారు. దేవాలయాలు, గ్రామ కూడళ్లలో పురోహితులు నూతన పంచాంగ శ్రవణాన్ని చేశారు. గ్రామాల్లోని దేవాలయాలకు గ్రామస్థులు కుటుంబ సభ్యులతో వెళ్లి ప్రత్యేక పూజలు చేశారు. చిన్నారులు నూతన వస్త్రాలు ధరించి తెలుగు సంవత్సరానికి స్వాగతం పలికారు. పట్టణ ప్రాంతాల్లో కవి సమ్మేళనాలు, నూతన వాహనాలు, బంగారు వస్తువుల కొనుగోలుకు ప్రజలు ఆసక్తి కనబరిచారు.