గ్రామాల్లో పరిశుభ్రత కోసం ప్రారంభించిన స్వచ్ఛ రథాలు ఇప్పుడు స్కూళ్లకు చేరుతున్నాయి. అనకాపల్లి జిల్లాలో పైలెట్ ప్రాజెక్టుగా ప్రతి గురువారం పాఠశాలలను సందర్శిస్తున్నాయి. విద్యార్థులు తెచ్చిన పాత పుస్తకాలు, ప్లాస్టిక్, లోహ వస్తువులకు బదులుగా పెన్నులు, అట్టలు ఇస్తున్నారు. ఇళ్ల వద్ద చెత్తకు బదులుగా నిత్యావసర సరుకులు లేదా నగదు అందిస్తున్నారు. ఈ ప్రయోగం విజయవంతమైతే రాష్ట్రవ్యాప్తంగా అమలు చేసే యోచనలో అధికారులు ఉన్నారు.
- చెత్తకు బదులుగా పెన్నులు, పుస్తకాలు
- అనకాపల్లిలో పైలెట్గా స్కూళ్ల వద్ద స్వచ్ఛ రథాలు
- పనికిరాని వస్తువులకు బదులుగా పెన్నులు, పుస్తకాలు
- గ్రామాల్లో చెత్తకు నగదు లేదా నిత్యావసర సరుకులు
- పొడి చెత్త తగ్గింపుతో పర్యావరణ పరిరక్షణ లక్ష్యం
- త్వరలో రాష్ట్రవ్యాప్త అమలుకు అధికారుల యోచన
బ్యూరో రిపోర్ట్ ఉత్తరాంధ్ర / విశాఖపట్టణం, పెన్ పవర్ , ఏప్రిల్ 7:
గ్రామీణ ప్రాంతాల్లో పరిశుభ్రతను ప్రోత్సహించేందుకు ఆంధ్రప్రదేశ్ ప్రభుత్వం చేపట్టిన స్వచ్ఛ రథాల కార్యక్రమం ఇప్పుడు పాఠశాలలకూ విస్తరించింది. ఇంటింటి నుంచి పనికిరాని వస్తువులు, చెత్త సేకరించే ఈ రథాలను తాజాగా స్కూళ్ల వద్దకు కూడా పంపిస్తూ విద్యార్థుల్లో పరిశుభ్రతపై అవగాహన పెంచుతున్నారు. అనకాపల్లి జిల్లాలో పైలెట్ ప్రాజెక్టుగా ఈ విధానాన్ని ప్రారంభించారు. ప్రతి గురువారం పాఠశాలలను సందర్శించే స్వచ్ఛ రథాల సిబ్బంది, విద్యార్థులు తెచ్చిన పాత పుస్తకాలు, అట్టపెట్టెలు, ప్లాస్టిక్ సీసాలు, లోహ వస్తువులను సేకరించి వాటి విలువను లెక్కించి పెన్నులు, పుస్తకాలు, అట్టలు లేదా నగదు అందిస్తున్నారు. ఇళ్ల వద్ద కూడా ఈ రథాలు పాత పేపర్లు, ఇనుము, ప్లాస్టిక్, అల్యూమినియం వంటి వస్తువులను సేకరిస్తూ నిత్యావసర సరుకులు లేదా నగదు ఇస్తున్నాయి. ఉదాహరణకు కేజీ ఇనుముకు రూ.20, పాత పేపర్లకు రూ.15, ప్లాస్టిక్ సీసాలకు రూ.20, అల్యూమినియం వస్తువులకు రూ.120 చొప్పున చెల్లిస్తున్నారు. బదులుగా కొబ్బరి నూనె, సబ్బులు, ఉల్లిపాయలు, గోధుమపిండి, కందిపప్పు వంటి సరుకులు అందిస్తున్నారు. పాఠశాలల్లో ఎక్కువగా ఉత్పత్తి అయ్యే పొడి చెత్త వల్ల పర్యావరణానికి ఇబ్బంది కలగకుండా ఉండేందుకు ఈ చర్యలు తీసుకుంటున్నారు. విద్యార్థుల్లో రీసైక్లింగ్ అలవాట్లు పెంపొందించడం, పరిశుభ్రమైన పాఠశాల వాతావరణం కల్పించడం ఈ ప్రణాళిక ముఖ్య ఉద్దేశం. పైలెట్ విజయవంతమైతే త్వరలోనే రాష్ట్రవ్యాప్తంగా అమలు చేసే దిశగా అధికారులు ఆలోచిస్తున్నారు.