పాకిస్తాన్లో ఆర్థిక సంక్షోభం, అంతర్గత అశాంతి, సరిహద్దు ఉద్రిక్తతల నడుమ “ఆపరేషన్ సింధూర్ 2.0”పై ఊహాగానాలు మళ్లీ వేడెక్కుతున్నాయి. రక్షణ మంత్రి రాజ్ నాధ్ సింగ్ చేసిన తాజా హెచ్చరికలు ఈ చర్చకు మరింత బలం చేకూర్చాయి.2025లో జరిగిన ఆపరేషన్ సింధూర్ తర్వాత భారత్ మరో కఠిన ప్రతిస్పందనకు సిద్ధమవుతోందా అన్న ప్రశ్నలు వినిపిస్తున్నాయి.సరిహద్దు రాష్ట్రాల్లో మాక్ డ్రిల్స్, సైనిక అప్రమత్తత, దౌత్య సంకేతాలు ఈ అంచనాలను పెంచుతున్నాయి. అయితే ఇది పూర్తి స్థాయి యుద్ధం కంటే లక్ష్యిత ఉగ్రవాద స్థావరాలపై దాడులకే పరిమితం కావచ్చని విశ్లేషకులు భావిస్తున్నారు.
- పాక్ సంక్షోభం మధ్య ‘సింధూర్ 2.0’ చర్చ
- రాజ్నాథ్ హెచ్చరికలతో ఊహాగానాలకు బలం
- సరిహద్దు రాష్ట్రాల్లో మాక్ డ్రిల్స్ జోరు
- పాక్లో అంతర్గత కలహాలు, ఆర్థిక ఒత్తిడి
- లక్ష్యిత దాడులకే భారత్ పరిమితమవుతుందా?
న్యూస్ డెస్క్ పెన్ పవర్, ఏప్రిల్ 7:
పశ్చిమాసియా యుద్ధ ప్రభావం, ఆఫ్గానిస్తాన్ సరిహద్దు ఉద్రిక్తతలు, బలూచిస్తాన్–ఖైబర్ పఖ్తూన్ఖ్వాలో తిరుగుబాట్లు, విదేశీ రుణ ఒత్తిళ్లతో పాకిస్తాన్ తీవ్ర సంక్షోభాన్ని ఎదుర్కొంటోంది. విదేశీ మారక నిల్వలు క్షీణించడం, ద్రవ్యోల్బణం పెరగడం వల్ల ఆ దేశం ఆర్థికంగా బలహీన స్థితిలో ఉందనే అంచనాలు ఉన్నాయి. ఈ పరిస్థితిని భారత్ వ్యూహాత్మకంగా గమనిస్తున్నట్లు రక్షణ వర్గాలు సూచిస్తున్నాయి. ఇటీవల రాజ్ నాధ్ సింగ్ త్రివిధ దళాధిపతులతో వరుస సమీక్షలు నిర్వహించి, పాకిస్తాన్ ఎలాంటి “misadventure” చేసినా “అప్రతిహత, నిర్ణాయక ప్రతిస్పందన” ఉంటుందని హెచ్చరించారు. ఆయన “ఆపరేషన్ సింధూర్ ఇంకా ముగియలేదు” అని చేసిన వ్యాఖ్యలు కొత్త సైనిక చర్యలపై ఊహాగానాలను పెంచాయి.అదే సమయంలో నేవీ చీఫ్ సముద్ర మార్గంలో దాడికి భారత్ “కొన్ని నిమిషాల దూరంలోనే” ఉన్నదని ఇటీవల వెల్లడించడం కూడా చర్చనీయాంశమైంది. పంజాబ్, రాజస్థాన్, గుజరాత్ సరిహద్దు ప్రాంతాల్లో మాక్ డ్రిల్స్, రేషన్ సిద్ధత, పౌర రక్షణ అభ్యాసాలు జరుగుతుండటం యుద్ధ సిద్ధతలో భాగమా అన్న సందేహాలను రేకెత్తిస్తోంది.అయితే భద్రతా విశ్లేషకుల అభిప్రాయం ప్రకారం, ఇది పూర్తి స్థాయి యుద్ధానికి దారితీయకపోవచ్చు. గతసారి మాదిరిగానే ఉగ్రవాద స్థావరాలు, లాంచ్ప్యాడ్లు, కీలక మౌలిక వసతులపై క్షిపణి దాడులు లేదా ఎయిర్ స్ట్రైక్స్ రూపంలో పరిమిత సైనిక చర్య జరిగే అవకాశమే ఎక్కువగా ఉందని చెబుతున్నారు. పాక్ అంతర్గత బలహీనతలు, అంతర్జాతీయ ఒత్తిడిని భారత్ వ్యూహాత్మకంగా వినియోగించుకోవచ్చని భావిస్తున్నారు.