- త్వరలో పూర్తికానున్న గొల్లపాలెం–కుయ్యేరు బీటీ రోడ్డు
తారు కొరత వల్లే జాప్యం.. అదనంగా రూ.2.78 కోట్ల నిధుల సమీకరణ
మండలంలో శరవేగంగా రోడ్ల అభివృద్ధి పనులు
కాజులూరు, పెన్పవర్, జూన్ 14:
కాజులూరు మండల ప్రజలకు రాష్ట్ర కార్మికశాఖ మంత్రి వాసంశెట్టి సుభాష్ తీపి కబురు అందించారు. ఎన్నో ఏళ్లుగా ఎదురుచూస్తున్న గొల్లపాలెం–కుయ్యేరు బీటీ రోడ్డు పనులు త్వరలో పూర్తికానున్నాయని మంత్రి స్పష్టం చేశారు. రోడ్డు నిర్మాణ పనులు నిలిచిపోకుండా ఉండేందుకు అదనంగా రూ.2.78 కోట్ల నిధులు సమీకరించినట్లు తెలిపారు.
ఇటీవల గొల్లపాలెంలోని తిరుమల ఫంక్షన్ హాల్లో జరిగిన పార్టీ కార్యకర్తల సమావేశంలో ముఖ్య అతిథిగా పాల్గొన్న మంత్రి సుభాష్, కాజులూరు మండల అభివృద్ధిపై ప్రత్యేకంగా మాట్లాడారు. నియోజకవర్గంలో అత్యధిక అభివృద్ధి నిధులు కాజులూరు మండలానికే కేటాయించినట్లు వెల్లడించారు. అభివృద్ధి విషయంలో ఎలాంటి రాజీ ఉండదని స్పష్టం చేశారు.
తారు కొరతతోనే పనుల జాప్యం
గొల్లపాలెం–కుయ్యేరు రోడ్డు పనులు ఆలస్యమవుతున్నాయనే విమర్శలకు మంత్రి స్పందిస్తూ, నిధుల కొరత వల్ల కాదని, గల్ఫ్ దేశాల్లో ఇటీవల నెలకొన్న పరిస్థితుల కారణంగా దిగుమతి తారుకు కొరత ఏర్పడటంతో బీటీ రోడ్డు పనులు కొంత ఆలస్యమయ్యాయని వివరించారు. అయితే ప్రస్తుతం పరిస్థితులు మెరుగుపడుతున్నందున పనులు వేగవంతం చేసి త్వరలో పూర్తి చేస్తామని హామీ ఇచ్చారు.
మంత్రి ప్రకటనతో సమావేశంలో పాల్గొన్న కార్యకర్తలు, స్థానిక ప్రజలు హర్షం వ్యక్తం చేశారు.
కూటమి ప్రభుత్వం అంటే అభివృద్ధే
కూటమి ప్రభుత్వం అధికారంలోకి వచ్చిన తర్వాత కాజులూరు మండలంలో అనేక కీలక రహదారి అభివృద్ధి పనులు చేపట్టినట్లు మంత్రి గుర్తు చేశారు. వాటిలో—
శలపాక–తణుకువాడ బీటీ రోడ్డు
తణుకువాడ సీసీ రోడ్డు
తిప్పరాజుపాలెం బీటీ రోడ్డు
గొల్లపాలెం సీసీ రోడ్డు
మొగలిపాలెం–మంజేరు గ్రావెల్ రోడ్డు
కాజులూరు ఏజీకేపేట శివారులో రూ.50 లక్షలతో సీసీ రోడ్డు
తిప్పరాజుపాలెం–కాజులూరు బీటీ రోడ్డు
ఆర్యావటం శ్మశానం వెనుక గడ్డిమేట్ల గట్టు గ్రావెల్ రోడ్డు
వంటి అనేక పనులు పూర్తయ్యాయని పేర్కొన్నారు.
అదేవిధంగా మంజేరు–శలపాక రోడ్డు కం బ్రిడ్జి, కుయ్యేరు సీసీ రోడ్డు సహా మరిన్ని పనులు కూడా త్వరలో పూర్తికానున్నాయని తెలిపారు.
కల్వర్టులు, బ్రిడ్జిల పరిశీలనలో ఆర్ అండ్ బి అధికారులు
ఇదిలా ఉండగా గొల్లపాలెం–కుయ్యేరు రోడ్డు పనుల పురోగతిపై రోడ్లు భవనాల శాఖ అధికారులు క్షేత్రస్థాయిలో పరిశీలనలు చేపట్టారు. ఆర్ అండ్ బి ఏఈ లక్ష్మీ ప్రసన్న మాట్లాడుతూ, బీటీ రోడ్డు పనులు ప్రారంభించే ముందు కల్వర్టులు, బ్రిడ్జిల నిర్మాణ పనులు పూర్తిచేయాల్సి ఉందని తెలిపారు. ప్రస్తుతం ఆ పనులు కొనసాగుతున్నాయని, అవి పూర్తికాగానే రోడ్డు నిర్మాణం వేగవంతమవుతుందని చెప్పారు.
ప్రతి గ్రామానికి మెరుగైన రహదారులే లక్ష్యం 
- మండలంలోని ప్రతి గ్రామానికి మెరుగైన రహదారి సదుపాయాలు కల్పించడమే కూటమి ప్రభుత్వ లక్ష్యమని మంత్రి సుభాష్ పేర్కొన్నారు. ప్రజలకు ఇబ్బందులు కలిగిస్తున్న అత్యవసర రహదారి నిర్మాణాలపై స్థానిక కూటమి నాయకులు ప్రతిపాదనలు, అంచనా పత్రాలు అందిస్తే స్వయంగా పరిశీలించి నిధుల మంజూరుకు కృషి చేస్తానని హామీ ఇచ్చారు.కాజులూరు మండలంలో జరుగుతున్న రహదారి అభివృద్ధి పనులు చూస్తుంటే అభివృద్ధి పట్ల మంత్రి వాసంశెట్టి సుభాష్ చూపుతున్న ప్రత్యేక శ్రద్ధ స్పష్టంగా కనిపిస్తోందని కూటమి నాయకులు పేర్కొన్నారు.
