Homeఆంధ్రప్రదేశ్విశాఖపట్నంఆ నిర్మాణానికి 'లక్ష్మీ కటాక్షం'

ఆ నిర్మాణానికి ‘లక్ష్మీ కటాక్షం’

 

.. బీఏ నంబర్‌ కోసం ఆమెను ‘ప్రసన్న’o చేసుకోవాలంట ..?

కర్త, కర్మ, క్రియ అంతా లక్ష్మీ ప్రసన్న చేతుల్లోనేనా..?

మురళీనగర్‌లో బహుళ అంతస్తుల భవనంపై అనుమానాల వెల్లువ!

అనుమతులు ఎన్ని అంతస్తులకు?.. నిర్మాణం ఎన్ని అంతస్తులు?.. సమాధానం చెప్పేదెవరు?

డబ్ల్యూపీఆర్ఎస్ లక్ష్మీ ప్రసన్న పర్యవేక్షణలో ఏం జరుగుతోంది?

టీపీబీవో అనిల్, ఏసీపీ తిరుపతిరావు స్పందించాలని స్థానికుల డిమాండ్!

బ్యూరో రిపోర్ట్ పెన్ పవర్ విశాఖపట్నం, నవంబర్ 21 :

మహా విశాఖ నగరపాలక సంస్థ (జీవీఎంసీ) పరిధిలో భవన నిర్మాణాలకు నిబంధనలు సామాన్యులకేనా? బహుళ అంతస్తుల నిర్మాణాలు చేపట్టే బిల్డర్ల విషయంలో వాటి అమలు ఎలా జరుగుతోంది? మురళీనగర్ 278వ సచివాలయ పరిధిలో బిల్డర్ చేపడుతున్నట్లు చెబుతున్న బహుళ అంతస్తుల నిర్మాణం నేపథ్యంలో ఇటువంటి ప్రశ్నలు తెరపైకి వస్తున్నాయి.

సదరు భవనానికి జీవీఎంసీ టౌన్ ప్లానింగ్ విభాగం నుంచి అసలు ఎలాంటి అనుమతులు మంజూరయ్యాయి? అనుమతించిన అంతస్తులు ఎన్ని? ప్రస్తుతం జరుగుతున్న నిర్మాణం ఆమోదిత ప్లాన్‌కు అనుగుణంగానే ఉందా? అన్న విషయాలపై స్పష్టత ఇవ్వాలని స్థానికులు కోరుతున్నారు. ముఖ్యంగా భవన అనుమతికి సంబంధించిన బిల్డింగ్ అప్రూవల్ (బీఏ) నంబర్‌ను బహిర్గతం చేయాలనే డిమాండ్ వినిపిస్తోంది.

బీఏ నంబర్ చెప్పడంలో మర్మమేంటి?

నిబంధనల ప్రకారం భవన నిర్మాణానికి సంబంధించిన అనుమతుల వివరాలు, ఆమోదిత ప్లాన్, అనుమతుల చెల్లుబాటు తదితర అంశాలను సంబంధిత అధికారులు ధ్రువీకరించాల్సి ఉంటుంది. అయితే రఘు నిర్మాణానికి సంబంధించిన బీఏ నంబర్, అనుమతించిన అంతస్తుల వివరాలు తమకు అందుబాటులో లేవని స్థానికులు చెబుతున్నారు.

ఈ నిర్మాణానికి అనుమతి ఉన్నట్లయితే సంబంధిత పర్మిట్ నంబర్, మంజూరు తేదీ, ఆమోదిత ప్లాన్ వివరాలను ప్రజల ముందుంచడంలో అభ్యంతరం ఏమిటన్న ప్రశ్న తలెత్తుతోంది.

జీవీఎంసీ టౌన్ ప్లానింగ్ నిబంధనలు ఏం చెబుతున్నాయి?

ఆంధ్రప్రదేశ్ భవన నిర్మాణ నిబంధనలు–2017, వాటికి ప్రభుత్వం చేసిన తాజా సవరణల ప్రకారం భవన నిర్మాణ అనుమతుల్లో స్థల విస్తీర్ణం, భూమి వినియోగం, రహదారి వెడల్పు, భవన ఎత్తు, సెట్‌బ్యాక్‌లు, పార్కింగ్ సదుపాయాలు, నిర్మాణ భద్రత వంటి అంశాలను పరిగణనలోకి తీసుకోవాలి.

ప్రస్తుత నిబంధనల ప్రకారం 24 మీటర్లు లేదా అంతకంటే ఎక్కువ ఎత్తున్న భవనాలను హై‌రైజ్ భవనాలుగా పరిగణిస్తారు. అవసరమైన సందర్భాల్లో అగ్నిమాపక శాఖ అనుమతులు, స్ట్రక్చరల్ సేఫ్టీ వివరాలు, ఇతర సంబంధిత క్లియరెన్స్‌లు కూడా తప్పనిసరి.

అలాగే భవన నిర్మాణానికి మంజూరైన ప్లాన్‌కు విరుద్ధంగా అదనపు అంతస్తులు నిర్మించడం, అనుమతించిన సెట్‌బ్యాక్‌లను నిబంధనలకు విరుద్ధంగా తగ్గించడం, పార్కింగ్ స్థలాన్ని ఇతర అవసరాలకు వినియోగించడం వంటి అంశాలు నిబంధనల ఉల్లంఘనలుగా పరిగణించబడే అవకాశం ఉంది.

ఈ నేపథ్యంలో ఈ నిర్మాణంలో ఏవైనా ప్లాన్ ఉల్లంఘనలు ఉన్నాయా? లేదా అన్ని అనుమతులకు అనుగుణంగానే పనులు జరుగుతున్నాయా? అనే విషయాన్ని జీవీఎంసీ అధికారులు క్షేత్రస్థాయిలో పరిశీలించి తేల్చాల్సిన అవసరం ఉందని స్థానికులు అభిప్రాయపడుతున్నారు

కర్త, కర్మ, క్రియ అంతా లక్ష్మీ ప్రసన్నేనా?

మురళీనగర్ 278వ సచివాలయ పరిధిలో డబ్ల్యూపీఆర్ఎస్ లక్ష్మీ ప్రసన్న పర్యవేక్షణ బాధ్యతల నేపథ్యంలో ఈ నిర్మాణానికి సంబంధించిన అంశాలు చర్చనీయాంశమయ్యాయి.

నిర్మాణ పురోగతిని ఎప్పటికప్పుడు పరిశీలిస్తున్నారా? అనుమతించిన ప్లాన్‌తో వాస్తవ నిర్మాణాన్ని పోల్చి చూశారా? ఏవైనా వ్యత్యాసాలు గుర్తించారా? గుర్తిస్తే ఉన్నతాధికారులకు నివేదించారా? అనే ప్రశ్నలకు సమాధానాలు రావాల్సి ఉంది.

ఈ వ్యవహారంలో ‘కర్త, కర్మ, క్రియ అంతా లక్ష్మీ ప్రసన్న చేతుల్లోనేనా?’ అంటూ వ్యక్తమవుతున్న సందేహాలకు అధికారిక రికార్డుల ద్వారా స్పష్టత ఇవ్వాల్సిన అవసరం కనిపిస్తోంది. అయితే ఆమె పాత్రపై వస్తున్న సందేహాలను నిర్ధారిత వాస్తవాలుగా పరిగణించలేమని, క్షేత్రస్థాయి నివేదికలే అసలు విషయాన్ని తేలుస్తాయని స్థానికులు పేర్కొంటున్నారు.

ఎన్నికలకు ముందు చర్యలు.. ఇప్పుడు నిర్మాణాలు?

ఎన్నికలకు ముందు ఈ నిర్మాణంపై అధికారులు చర్యలు చేపట్టినట్లు ప్రచారం జరిగిందని స్థానికులు చెబుతున్నారు. ఆ సమయంలో ఏవైనా నోటీసులు జారీ చేశారా? నిర్మాణ పనులను నిలిపివేయాలని ఆదేశించారా? ఒకవేళ చర్యలు తీసుకుంటే ప్రస్తుతం పనులు ఏ అనుమతుల ఆధారంగా కొనసాగుతున్నాయి? అనే ప్రశ్నలు వ్యక్తమవుతున్నాయి.

గతంలో ఎలాంటి చర్యలు తీసుకున్నారన్న దానిపై అధికారిక రికార్డులు బహిర్గతం కావాల్సి ఉంది. నోటీసులు జారీ చేసి ఉంటే వాటి ప్రతులు, వాటిపై బిల్డర్ ఇచ్చిన వివరణ, తదనంతరం అధికారులు తీసుకున్న నిర్ణయాలను ప్రజలకు తెలియజేయాలని డిమాండ్ వినిపిస్తోంది.

టీపీబీవో అనిల్.. ఏసీపీ తిరుపతిరావు ఏం చెబుతారు?

క్షేత్రస్థాయిలో పర్యవేక్షణ నిర్వహించే డబ్ల్యూపీఆర్ఎస్ లక్ష్మీ ప్రసన్నతో పాటు టీపీబీవో అనిల్, ఏసీపీ తిరుపతిరావు ఈ నిర్మాణానికి సంబంధించిన అనుమతులు, తనిఖీలు, చర్యల వివరాలపై స్పష్టత ఇవ్వాలని స్థానికులు కోరుతున్నారు.

ముఖ్యంగా భవన నిర్మాణానికి మంజూరైన బీఏ నంబర్, ఆమోదించిన అంతస్తుల సంఖ్య, స్థల విస్తీర్ణం, పార్కింగ్ ప్రణాళిక, సెట్‌బ్యాక్ వివరాలు, అవసరమైన భద్రతా అనుమతులు వంటి అంశాలను అధికారికంగా కన్స్ట్రక్షన్ ఏరియాలో ఒక బోర్డుపై ఉంచాలని
ఆంధ్రప్రదేశ్ భవన నిర్మాణ నిబంధనలు–2017 (జీవో ఎంఎస్ నం.119), జూలై 29, 2026 నాటి జీవో ఎంఎస్ నం.161 సవరణలు, జీవీఎంసీ భవన అనుమతుల ప్రకారం వెల్లడించాలి… కానీ ఆ ఏరియాలో అలాంటి పుణ్యానికి పోయిన పరిస్థితి లేదు… ఇది ఎవరి ప్రోద్భలంతో జరుగుతుంది… అన్నది తేలాల్సి ఉంది?

అక్రమ నిర్మాణమా?.. నిబంధనలకు లోబడిన నిర్మాణమా?

ఈ నిర్మాణానికి సంబంధించిన ఆమోదిత ప్లాన్‌ను, ప్రస్తుతం చేపట్టిన నిర్మాణాన్ని జీవీఎంసీ టౌన్ ప్లానింగ్ ఉన్నతాధికారులు పరిశీలించి, ఏవైనా ఉల్లంఘనలు ఉంటే వాటిని స్పష్టంగా గుర్తించాలని స్థానికులు కోరుతున్నారు.

నిర్మాణం సక్రమమే అయితే అనుమతుల వివరాలు వెల్లడించాలి. నిబంధనల ఉల్లంఘనలు నిర్ధారణ అయితే చట్టప్రకారం చర్యలు చేపట్టాలి. అన్నదే స్థానికుల ప్రధాన డిమాండ్.

మరి ఈ నిర్మాణంపై వస్తున్న ప్రశ్నలకు జీవీఎంసీ అధికారులు ఏం సమాధానం చెబుతారు? బీఏ నంబర్‌ను వెల్లడించి అనుమానాలకు తెరదించుతారా? లేక ఈ వ్యవహారంపై మరిన్ని సందేహాలకు అవకాశం కల్పిస్తారా? అనేది వేచి చూడాల్సిందే.

RELATED ARTICLES
- Advertisment -

Most Popular