కర్నూలు పరిపాలనా ప్రాధాన్యానికి మరోసారి బలం చేకూరింది.వక్ఫ్ ట్రైబ్యునల్ను అమరావతికి తరలించాలని దాఖలైన పిల్ను ఏపీ హైకోర్టు కొట్టివేసింది.అదే సమయంలో లోకాయుక్త, మానవ హక్కుల కమిషన్ కార్యాలయాలను కూడా కర్నూలులోనే కొనసాగిస్తామని ప్రభుత్వం కోర్టుకు స్పష్టం చేసింది. దీంతో మూడు ప్రధాన సంస్థల కార్యాలయాలు కర్నూలులోనే కొనసాగనున్నట్లు స్పష్టత వచ్చింది.రాయలసీమ పరిపాలనా ప్రాధాన్యంపై ఈ నిర్ణయం కొత్త చర్చకు దారితీసింది.
- వక్ఫ్ ట్రైబ్యునల్పై హైకోర్టు స్పష్టమైన తీర్పు
- కేసుల భారం కర్నూలుకే అనుకూలం
- లోకాయుక్త, హెచ్ఆర్సీపై ప్రభుత్వ హామీ
- రాయలసీమకు పరిపాలనా బలం పెరిగినట్లే
- హైకోర్టు బెంచ్ డిమాండ్ మళ్లీ హాట్ టాపిక్
- వక్ఫ్ ట్రైబ్యునల్ తరలింపు పిల్ డిస్మిస్.. కర్నూలు ప్రాధాన్యం యథాతథం
- లోకాయుక్త, హెచ్ఆర్సీ కూడా కర్నూలులోనే.. ప్రభుత్వ క్లారిటీ
కర్నూలు, పెన్ పవర్, ఏప్రిల్ 09:
కర్నూలులోని రాష్ట్ర వక్ఫ్ ట్రైబ్యునల్ను అమరావతికి తరలించాలని కోరుతూ దాఖలైన ప్రజాప్రయోజన వ్యాజ్యాన్ని ఏపీ హైకోర్టు తిరస్కరించింది. వక్ఫ్ ట్రైబ్యునల్కు సంబంధించిన ఎక్కువ కేసులు కర్నూలు మరియు పరిసర జిల్లాల నుంచే వస్తుండటంతో అక్కడే కొనసాగించడం సముచితమని కోర్టు అభిప్రాయపడింది. ప్రభుత్వం తరఫున కూడా ట్రైబ్యునల్ను కర్నూలులోనే కొనసాగించాలని నిర్ణయించినట్లు న్యాయవాది కోర్టుకు తెలియజేశారు. పిటిషనర్ తరఫున పరిపాలనా సౌలభ్యం కోసం అమరావతికి తరలించాలని వాదనలు వినిపించినప్పటికీ, కేసుల స్వభావం, వక్ఫ్ ఆస్తుల మెజారిటీ రాయలసీమ ప్రాంతంలో ఉండటాన్ని ప్రభుత్వం ప్రధానంగా ప్రస్తావించింది. ఈ వాదనలను పరిగణనలోకి తీసుకున్న ధర్మాసనం పిల్ను కొట్టివేసింది. మరోవైపు, కర్నూలులో కొనసాగుతున్న మానవ హక్కుల కమిషన్ (HRC), లోకాయుక్త కార్యాలయాలను కూడా అక్కడే ఉంచాలని రాష్ట్ర ప్రభుత్వం హైకోర్టుకు స్పష్టం చేసింది. సిబ్బంది విభజన, పరిపాలనా అంశాలు ఇంకా పూర్తి కాలేదని, త్వరలో లోకాయుక్త నియామకంపై కూడా నిర్ణయం తీసుకుంటామని ప్రభుత్వం తెలిపింది. ఈ పరిణామంతో వక్ఫ్ ట్రైబ్యునల్, లోకాయుక్త, హెచ్ఆర్సీ వంటి మూడు కీలక కార్యాలయాలు కర్నూలులోనే కొనసాగనున్నాయి. రాయలసీమ పరిపాలనా ప్రాధాన్యాన్ని నిలబెట్టే నిర్ణయంగా దీనిని రాజకీయ, న్యాయ వర్గాలు విశ్లేషిస్తున్నాయి. భవిష్యత్తులో హైకోర్టు బెంచ్ అంశం కూడా మళ్లీ చర్చకు వచ్చే అవకాశాలు కనిపిస్తున్నాయి.
