ఆదివాసుల హక్కులకు ఎస్టీ కమిషన్ రక్షణ కవచం కావాలి
ఎస్టీ కమిషన్ ఏర్పాటు హర్షణీయం
చైర్మన్ పదవి ఆదివాసీ వ్యక్తికే కేటాయించాలి
– ఏఎస్‌యూ రాష్ట్ర వర్కింగ్ ప్రెసిడెంట్ డాక్టర్ సాగబోయిన పాపారావు
కాప్రా, పెన్ పవర్, నవంబర్ 7:
తెలంగాణ ప్రజా ప్రభుత్వం ఎస్టీ కమిషన్ ఏర్పాటు చేయాలనే నిర్ణయం తీసుకోవడం హర్షణీయమని ఆదివాసీ విద్యార్థి సంఘం (ఏఎస్‌యూ) రాష్ట్ర వర్కింగ్ ప్రెసిడెంట్ డాక్టర్ సాగబోయిన పాపారావు అన్నారు. రాష్ట్రంలోని ఆదివాసీ ప్రజల హక్కుల పరిరక్షణ, సామాజిక న్యాయ సాధన దిశగా ఎస్టీ కమిషన్ కీలక పాత్ర పోషించాలని ఆయన ఆకాంక్షించారు.
ఆదివాసీ సమాజానికి రాజ్యాంగం కల్పించిన హక్కులు, రక్షణలు, సంక్షేమ పథకాలు క్షేత్రస్థాయిలో సమర్థవంతంగా అమలయ్యేలా కమిషన్ పర్యవేక్షించాల్సిన అవసరం ఉందన్నారు. ముఖ్యంగా ఆదివాసీలు ఎదుర్కొంటున్న భూ సమస్యలు, పోడు భూములు, అటవీ హక్కులు, విద్య, ఉద్యోగ, వైద్య రంగాల్లో వెనుకబాటుతనం, రాజ్యాంగబద్ధ హక్కుల ఉల్లంఘన వంటి అంశాలపై ప్రత్యేక దృష్టి సారించాలని కోరారు.
ఆదివాసీ వ్యక్తికే చైర్మన్ పదవి
ఎస్టీ కమిషన్ చైర్మన్ పదవిని అర్హత, సామర్థ్యం, సామాజిక నిబద్ధత కలిగిన ఆదివాసీ వ్యక్తికే కేటాయించాలని డాక్టర్ పాపారావు ప్రభుత్వాన్ని డిమాండ్ చేశారు. ఆదివాసీల జీవన విధానం, సంస్కృతి, సంప్రదాయాలు, భౌగోళిక పరిస్థితులు, సమస్యలు, రాజ్యాంగపరమైన హక్కులపై పూర్తి అవగాహన ఉన్న వ్యక్తి చైర్మన్‌గా ఉంటే సమస్యల పరిష్కారం మరింత సమర్థవంతంగా జరుగుతుందని పేర్కొన్నారు.
ఆదివాసుల కోసం ఏర్పాటయ్యే కమిషన్‌కు ఆదివాసీలే నాయకత్వం వహించాల్సిన అవసరం ఉందన్నారు. ఆదివాసీ మేధావులు, విద్యావేత్తలు, న్యాయ నిపుణులు, సామాజిక ఉద్యమకారులకు కమిషన్‌లో తగిన ప్రాతినిధ్యం కల్పించాలని కోరారు.
భూములు అన్యాక్రాంతం కాకుండా చర్యలు
ఐదవ షెడ్యూల్ ప్రాంతాల్లో రాజ్యాంగ నిబంధనలు, చట్టాల అమలును ఎస్టీ కమిషన్ పర్యవేక్షించాలని అన్నారు. పెసా చట్టం (పేసా), 1/70 భూ బదలాయింపు నియంత్రణ చట్టం అమలుపై ప్రత్యేక పర్యవేక్షణ ఉండాలని సూచించారు. ఆదివాసీల భూములు అన్యాక్రాంతం కాకుండా కఠిన చర్యలు తీసుకోవాలని కోరారు.
అటవీ హక్కుల చట్టం అమలు, పోడు భూముల సమస్యల పరిష్కారం, ఆదివాసీ విద్యార్థులకు నాణ్యమైన విద్య, ఫీజు రీయింబర్స్‌మెంట్, ఉపాధి అవకాశాల కల్పనపై కమిషన్ ప్రభుత్వానికి తగిన సూచనలు చేయాలని అన్నారు.
ఆదివాసుల గొంతుకగా నిలవాలి
ఆదివాసీలపై జరిగే దాడులు, వివక్ష, దోపిడీ, అన్యాయాలపై విచారణ జరిపించేలా కమిషన్‌కు సమర్థవంతమైన వ్యవస్థ ఉండాలని డాక్టర్ పాపారావు అన్నారు. ఆదివాసీ భాష, సంస్కృతి, సంప్రదాయాల పరిరక్షణకు చర్యలు తీసుకోవడంతో పాటు ప్రభుత్వ సంక్షేమ పథకాల ఫలాలు అర్హులైన ఆదివాసీలకు చేరుతున్నాయా లేదా పర్యవేక్షించాలన్నారు.
ఎస్టీ కమిషన్ కేవలం ఒక పరిపాలనా సంస్థగా కాకుండా ఆదివాసీ ప్రజల గొంతుకగా, వారి హక్కులకు రక్షణ కవచంగా పనిచేయాలని ఆయన కోరారు. ఎస్టీ కమిషన్ ఏర్పాటు నిర్ణయాన్ని స్వాగతిస్తున్నామని, అదే సమయంలో చైర్మన్ పదవిని ఆదివాసీ వ్యక్తికే కేటాయించి ఆదివాసీ సమాజానికి తగిన గౌరవం, ప్రాతినిధ్యం కల్పించాలని ప్రజా ప్రభుత్వాన్ని డాక్టర్ సాగబోయిన పాపారావు కోరారు.
