బెజవాడ డిప్యూటీ మేయర్గిరీపై ఆశావహుల కన్ను!
సీనియర్ల అనుభవమా.. యువ కార్పొరేటర్ల ఉత్సాహమా?
టీడీపీకి పదవి ఖాయమంటున్న ఎంపీ.. పట్టువదలని బీజేపీ ఆశలు!
రెండో కుర్చీ కోసం రాజకీయ రణం!
సంఖ్యాబలం టీడీపీదే.. అయినా బీజేపీ ఆశలు!
మేయర్ జనసేనకు.. డిప్యూటీ టీడీపీకేనా?
ఎంపీ వ్యాఖ్యలతో టీడీపీలో పెరిగిన ధీమా!
తూర్పులో యువ నాయకత్వానికి అవకాశముందా?
సెంట్రల్, పశ్చిమం నుంచి సీనియర్ల ప్రయత్నాలు!
సీనియారిటీకి పెద్దపీటా.. యువతకు పట్టాభిషేకమా?
చివరి మాట ఎవరిది?.. అందలం ఎక్కేదెవరు?
పెన్ పవర్, విజయవాడ, నవంబరు 20:
ఒక ఊరిలో పెద్ద కుర్చీ ఎవరికి దక్కాలో తేలిపోయిందట. ఇక అంతా ప్రశాంతమే అనుకునేలోపే.. ఆ పెద్ద కుర్చీ పక్కన ఉండే రెండో కుర్చీ కోసం అసలు పోటీ మొదలైందట! ఇప్పుడు బెజవాడ నగర రాజకీయాల్లోనూ అచ్చం ఇదే పరిస్థితి కనిపిస్తోంది. మేయర్ పీఠం జనసేన ఖాతాలోకి వెళ్లడంతో అందరి చూపూ డిప్యూటీ మేయర్ కుర్చీపై పడింది. పైకి కూటమి ఐక్యత కనిపిస్తున్నా.. లోపల మాత్రం పదవిని దక్కించుకునేందుకు ఆశావహుల ప్రయత్నాలు ఊపందుకున్నాయి. ఒకవైపు సీనియారిటీ, మరోవైపు యువ నాయకత్వం.. ఇంకోవైపు పార్టీల మధ్య పదవుల పంపకాలు.. ఇలా డిప్యూటీ మేయర్ ఎంపిక బెజవాడ రాజకీయాల్లో ఆసక్తికర చర్చకు తెరలేపింది.
విజయవాడ నగరపాలక సంస్థకు ఈ నెల 1న ఎన్నికలు జరగ్గా, 3న వెలువడిన ఫలితాల్లో కూటమి తిరుగులేని ఆధిక్యాన్ని సాధించింది. మొత్తం 86 డివిజన్లలో టీడీపీ అత్యధికంగా 53 స్థానాలను కైవసం చేసుకుంది. జనసేన 19, బీజేపీ నాలుగు స్థానాల్లో విజయం సాధించడంతో కూటమి బలం 76కు చేరింది. వైఎస్సార్సీపీ కేవలం ఎనిమిది స్థానాలకే పరిమితం కాగా, స్వతంత్ర అభ్యర్థి ఒక స్థానంలో, సీపీఎం మరో స్థానంలో గెలుపొందాయి. కూటమిలో అత్యధిక స్థానాలు గెలుచుకున్న టీడీపీకి డిప్యూటీ మేయర్ పదవి దక్కడం సహజమనే అభిప్రాయం ఆ పార్టీ వర్గాల్లో వ్యక్తమవుతోంది. అయితే బీజేపీ కూడా ఈ పదవిపై ఆశలు పెట్టుకోవడంతో రాజకీయ సమీకరణాలు ఆసక్తికరంగా మారాయి. మేయర్ పీఠాన్ని జనసేనకు కేటాయించిన నేపథ్యంలో డిప్యూటీ మేయర్ పదవి తమకే దక్కాలన్నది టీడీపీ నేతల వాదన. కూటమి విజయానికి ప్రధాన బలంగా నిలిచిన తమ పార్టీకి రెండో అత్యున్నత పదవి ఇవ్వడమే సముచితమని భావిస్తున్నారు. మరోవైపు ఎన్నికల్లో తమకు తక్కువ కార్పొరేటర్ స్థానాలు కేటాయించారని భావిస్తున్న బీజేపీ నేతలు, ఆ లోటును డిప్యూటీ మేయర్ పదవితో భర్తీ చేయాలని కోరే అవకాశముంది. నాలుగు స్థానాల బలమే ఉన్నప్పటికీ కూటమిలో భాగస్వామ్య పార్టీగా తమకు ప్రాధాన్యం ఇవ్వాలన్న ఆశ బీజేపీలో కనిపిస్తోంది. అయితే సంఖ్యాబలాన్ని పరిగణనలోకి తీసుకుంటే టీడీపీకే అవకాశాలు ఎక్కువగా ఉన్నాయనే చర్చ సాగుతోంది.డిప్యూటీ మేయర్ పదవి విషయంలో విజయవాడ ఎంపీ కేశినేని శివనాథ్ చేసిన వ్యాఖ్యలు రాజకీయంగా ప్రాధాన్యం సంతరించుకున్నాయి. మేయర్ స్థానం జనసేనకు కేటాయించినందున డిప్యూటీ మేయర్ పదవి టీడీపీకే దక్కుతుందని ఆయన స్పష్టం చేశారు. అయితే కూటమి నాయకత్వం సమావేశమై చర్చించిన తర్వాతే తుది నిర్ణయం వెలువడుతుందని పేర్కొన్నారు. బీజేపీ ఎన్టీఆర్ జిల్లా అధ్యక్షుడు అడ్డూరి శ్రీరామ్కు కూడా సముచిత స్థానం కల్పిస్తామని ఎంపీ చెప్పడం గమనార్హం. దీంతో డిప్యూటీ మేయర్ పదవి విషయంలో టీడీపీకి స్పష్టమైన సంకేతాలు అందుతున్నప్పటికీ, బీజేపీ ఆశావహులకు ఎలాంటి ప్రాధాన్యం దక్కుతుందనేది చర్చనీయాంశమైంది. డిప్యూటీ మేయర్ రేసులో విజయవాడ తూర్పు నియోజకవర్గం నుంచి రెండు యువ పేర్లు ప్రముఖంగా వినిపిస్తున్నాయి. 13వ డివిజన్ నుంచి విజయం సాధించిన దేవినేని నాగమహిత, 16వ డివిజన్ నుంచి గెలుపొందిన కిలారు నాగశ్రావణ్ తొలిసారిగా కార్పొరేటర్లుగా ఎన్నికయ్యారు. ఉన్నత విద్యావంతులైన వీరిద్దరి పేర్లు డిప్యూటీ మేయర్ పదవికి పరిశీలనలో ఉండవచ్చనే ప్రచారం సాగుతోంది. కొత్త తరానికి అవకాశం కల్పించాలనే ఆలోచనకు కూటమి నాయకత్వం ప్రాధాన్యం ఇస్తే వీరి పేర్లు ముందుకు వచ్చే అవకాశముంది. ఇదే నియోజకవర్గంలోని 19వ డివిజన్ నుంచి నాలుగోసారి విజయం సాధించిన సీనియర్ కార్పొరేటర్ ముమ్మినేని ప్రసాద్ పేరు కూడా గట్టిగానే వినిపిస్తోంది. ఆయనకున్న రాజకీయ అనుభవం, వరుస విజయాలు సీనియారిటీ కోణంలో ప్రాధాన్యం సంతరించుకున్నాయి. డిప్యూటీ మేయర్ పీఠంపై విజయవాడ సెంట్రల్, పశ్చిమ నియోజకవర్గాల నేతలు కూడా ఆశలు పెట్టుకున్నారు. సెంట్రల్ నుంచి సీనియర్ కార్పొరేటర్ నెల్లిబండ్ల బాలస్వామి, వీరమాచినేని లలిత పేర్లు రేసులో వినిపిస్తున్నాయి. పశ్చిమ నియోజకవర్గం నుంచి సీనియర్ కార్పొరేటర్ ఉమ్మడి వెంకటేశ్వరరావు ప్రయత్నాలు చేస్తున్నట్లు తెలుస్తోంది. వీరంతా తమ రాజకీయ అనుభవం, పార్టీ పట్ల విధేయత, స్థానికంగా ఉన్న పరిచయాలు ఉపయోగపడతాయని ఆశిస్తున్నారు. మరోవైపు బీజేపీ తరఫున 49వ డివిజన్ నుంచి విజయం సాధించిన ఆ పార్టీ ఎన్టీఆర్ జిల్లా అధ్యక్షుడు అడ్డూరి శ్రీరామ్ కూడా డిప్యూటీ మేయర్ పదవిపై ఆసక్తి చూపుతున్నట్లు ప్రచారం జరుగుతోంది. ఇప్పుడు కూటమి నాయకత్వం ముందున్న ప్రశ్న ఒక్కటే. డిప్యూటీ మేయర్ పదవి విషయంలో సీనియారిటీకి ప్రాధాన్యం ఇవ్వాలా? లేక యువ నాయకత్వాన్ని ప్రోత్సహించాలా? అనుభవజ్ఞులైన కార్పొరేటర్లకు అవకాశం కల్పిస్తే నగరపాలనలో వారి అనుభవం ఉపయోగపడుతుందనే వాదన ఉంది. మరోవైపు ఉన్నత విద్యావంతులైన కొత్తతరం కార్పొరేటర్లకు అవకాశం ఇస్తే యువ నాయకత్వాన్ని ప్రోత్సహించినట్లవుతుందనే అభిప్రాయమూ వినిపిస్తోంది. వీటికి తోడు మూడు నియోజకవర్గాల మధ్య రాజకీయ సమతుల్యత, కూటమి పార్టీల ఆకాంక్షలు కూడా ఎంపికలో కీలకంగా మారే అవకాశముంది. మొత్తానికి బెజవాడలో డిప్యూటీ మేయర్ కుర్చీ చుట్టూ రాజకీయ సందడి రోజురోజుకూ పెరుగుతోంది. టీడీపీకి సంఖ్యాబలం అండగా ఉండగా, బీజేపీకి కూటమి భాగస్వామ్యమే ఆశగా కనిపిస్తోంది. పదవి టీడీపీకి దక్కుతుందన్న ఎంపీ కేశినేని వ్యాఖ్యలతో ఆ పార్టీ ఆశావహుల్లో ఉత్సాహం పెరిగినా, అభ్యర్థి ఎవరన్న ప్రశ్నకు మాత్రం ఇంకా సమాధానం రాలేదు. తూర్పు నుంచి యువ కార్పొరేటర్లు, సెంట్రల్, పశ్చిమం నుంచి సీనియర్లు తమ అదృష్టాన్ని పరీక్షించుకునేందుకు ప్రయత్నిస్తున్నారు. చివరికి అనుభవం గెలుస్తుందా? యువతకు అవకాశం దక్కుతుందా? లేక కూటమి సమీకరణాల్లో అనూహ్య నిర్ణయం వెలువడుతుందా? అన్నది ఆసక్తికరంగా మారింది. మేయర్ కుర్చీపై స్పష్టత వచ్చినా.. డిప్యూటీ మేయర్ కుర్చీ మాత్రం ఇంకా ఆశావహుల మధ్య దోబూచులాడుతోంది. ఆ కుర్చీలో ఎవరిని కూర్చోబెట్టాలన్నది కూటమి పెద్దల నిర్ణయంపైనే ఆధారపడి ఉంది. అప్పటివరకు బెజవాడ రాజకీయాల్లో ఈ కుర్చీల కుస్తీ కొనసాగడం ఖాయంగా కనిపిస్తోంది!

