- 140 కి.మీ దూరం తగ్గింపు..
- బొగ్గు రవాణాలో విప్లవాత్మక మార్పులకు దారితీసే ప్రాజెక్టు
- మళ్లీ తెరపైకి వచ్చిన సత్తుపల్లి–కొవ్వూరు రైల్వే లైన్
- రైల్వే శాఖకు 14 శాతానికి పైగా రాబడి అంచనా
- పునర్వ్యవస్థీకరణ చట్టం హామీలను గుర్తు చేసిన ఏపీ
- సింగరేణి బొగ్గు రవాణాకు కొత్త మార్గం
- కాకినాడ పోర్టుకు తగ్గనున్న ప్రయాణ దూరం
- భూసేకరణలో పూర్తి సహకారం అందిస్తామన్న ప్రభుత్వం
తెలంగాణలోని సత్తుపల్లి నుంచి ఆంధ్రప్రదేశ్లోని కొవ్వూరు వరకు ప్రతిపాదిత రైల్వే లైన్ ప్రాజెక్టు మళ్లీ ప్రాధాన్యం సంతరించుకుంది. దాదాపు 119 కిలోమీటర్ల పొడవున నిర్మించనున్న ఈ కొత్త మార్గం పూర్తయితే తెలుగు రాష్ట్రాల మధ్య రైల్వే అనుసంధానం బలోపేతం కావడంతో పాటు సింగరేణి బొగ్గు రవాణాకు కొత్త దిశ లభించనుంది. కాకినాడ పోర్టుకు బొగ్గు రవాణా దూరం 140 కిలోమీటర్లకు పైగా తగ్గడంతో రైల్వే శాఖకు భారీ ఆదాయం సమకూరే అవకాశం ఉందని ఆంధ్రప్రదేశ్ ప్రభుత్వం అంచనా వేస్తోంది. ఈ నేపథ్యంలో ప్రాజెక్టును పూర్తిగా కేంద్ర నిధులతోనే చేపట్టాలని రైల్వే బోర్డుకు రాష్ట్ర ప్రభుత్వం తాజా ప్రతిపాదన పంపింది.
పెన్ పవర్ ప్రత్యేక ప్రతినిధి| ఏలూరు | జూన్ 15 :
తెలుగు రాష్ట్రాల మధ్య రైల్వే అనుసంధానాన్ని మరింత బలోపేతం చేసే సత్తుపల్లి–కొవ్వూరు రైల్వే లైన్ ప్రాజెక్టు మరోసారి చర్చనీయాంశంగా మారింది. దశాబ్దాలుగా పెండింగ్లో ఉన్న ఈ ప్రాజెక్టును త్వరితగతిన అమలు చేయాలని ఆంధ్రప్రదేశ్ ప్రభుత్వం తాజాగా రైల్వే బోర్డును కోరింది. ఈ రైల్వే మార్గం నిర్మాణం పూర్తయితే రవాణా రంగంతో పాటు పారిశ్రామిక, వాణిజ్య రంగాలకు కూడా గణనీయమైన ప్రయోజనాలు చేకూరనున్నాయి.
రాష్ట్ర ప్రభుత్వం రూపొందించిన తాజా నివేదిక ప్రకారం ఈ ప్రాజెక్టు ద్వారా రైల్వే శాఖకు భారీ స్థాయిలో ఆదాయం లభించే అవకాశం ఉంది. ప్రాజెక్టు వ్యయంతో పోలిస్తే వచ్చే రాబడి 14 శాతానికి మించి ఉంటుందని అంచనా వేస్తున్నారు. సాధారణంగా ఏ రైల్వే ప్రాజెక్టు అయినా 10 శాతానికి మించిన ఎఫ్ఐఆర్ఆర్ (Financial Internal Rate of Return) సాధిస్తే లాభదాయకంగా పరిగణిస్తారు. ఈ నేపథ్యంలో ప్రాజెక్టును పూర్తిగా కేంద్ర ప్రభుత్వ నిధులతోనే నిర్మించాలని రాష్ట్ర ప్రభుత్వం ప్రతిపాదించింది.
వాస్తవానికి భద్రాచలం రోడ్ (కొత్తగూడెం) నుంచి కొవ్వూరు వరకు రైల్వే లైన్ నిర్మాణానికి ఉమ్మడి ఆంధ్రప్రదేశ్ కాలంలోనే ఆమోదం లభించింది. అయితే అప్పట్లో ప్రాజెక్టు వ్యయంలో రాష్ట్ర ప్రభుత్వం కూడా సగం వాటా భరించాలనే షరతు ఉండేది. రాష్ట్ర విభజన అనంతరం మారిన పరిస్థితుల్లో తెలంగాణ ప్రభుత్వం ఈ ప్రాజెక్టుకు నిధులు కేటాయించేందుకు ఆసక్తి చూపకపోవడంతో పనులు ముందుకు సాగలేదు.
అయితే సింగరేణి బొగ్గు గనుల అవసరాలను దృష్టిలో ఉంచుకుని తెలంగాణ పరిధిలోని భద్రాచలం రోడ్ నుంచి సత్తుపల్లి వరకు ఇప్పటికే రైల్వే లైన్ నిర్మాణం పూర్తయింది. ప్రస్తుతం సత్తుపల్లి నుంచి కొవ్వూరు వరకు 118.9 కిలోమీటర్ల మేర కొత్త మార్గాన్ని నిర్మించాల్సి ఉంది. ఇందులో దాదాపు 70.31 కిలోమీటర్ల మార్గం ఆంధ్రప్రదేశ్ పరిధిలోకి వస్తుంది.
ఈ ప్రాజెక్టు అమలు వల్ల అత్యంత కీలకమైన ప్రయోజనం బొగ్గు రవాణాలో కనిపించనుంది. కొత్తగూడెం, మణుగూరు ప్రాంతాల్లోని సింగరేణి గనుల నుంచి వెలికితీసే బొగ్గును కాకినాడ పోర్టుకు తరలించే దూరం సుమారు 140 కిలోమీటర్లకు పైగా తగ్గుతుంది. దీంతో రైల్వే రవాణా ఖర్చులు గణనీయంగా తగ్గడంతో పాటు సమయ పొదుపు కూడా సాధ్యమవుతుంది.
పారిశ్రామిక రంగానికి ఈ ప్రాజెక్టు కీలక మౌలిక సదుపాయంగా మారనుంది. బొగ్గు రవాణా వేగవంతం కావడంతో విద్యుత్ ఉత్పత్తి సంస్థలు, పోర్టులు, పరిశ్రమలకు ప్రత్యక్ష ప్రయోజనం కలుగుతుంది. అంతేకాకుండా భవిష్యత్తులో ప్రయాణికుల రవాణాకు కూడా ఈ మార్గం ఉపయోగపడే అవకాశం ఉంది.
ఇప్పటికే ఈ ప్రాజెక్టుకు అయ్యే వ్యయంలో రాష్ట్ర ప్రభుత్వ వాటా లేదా కనీసం భూసేకరణ ఖర్చును భరించాలని రైల్వే శాఖ గతంలో ప్రతిపాదించినప్పటికీ, ఆంధ్రప్రదేశ్ పునర్వ్యవస్థీకరణ చట్టంలో ఈ ప్రాజెక్టు కేంద్రం చేపట్టాల్సిన బాధ్యతగా పేర్కొన్న విషయాన్ని రాష్ట్ర ప్రభుత్వం గుర్తు చేస్తోంది. అందువల్ల మొత్తం నిధులను కేంద్ర ప్రభుత్వం కేటాయించాలని డిమాండ్ చేస్తోంది.
ప్రాజెక్టు అమలుకు అవసరమైన భూసేకరణ, అనుమతులు, పరిపాలనాపరమైన సహకారం అందించేందుకు రాష్ట్ర ప్రభుత్వం సిద్ధంగా ఉందని అధికార వర్గాలు స్పష్టం చేస్తున్నాయి. తెలుగు రాష్ట్రాల మధ్య ఆర్థిక అనుసంధానాన్ని బలోపేతం చేయడంతో పాటు రైల్వే ఆదాయాన్ని పెంచే ఈ ప్రాజెక్టు త్వరలోనే కార్యరూపం దాల్చుతుందా లేదా అన్నది ఇప్పుడు ఆసక్తికరంగా మారింది.
