విద్యార్థులకు నాణ్యమైన విద్య, పౌష్టికాహారం అందించాలి
ప్రభుత్వ పాఠశాలలో ఎమ్మెల్యే మిరియాల శిరీషాదేవి ఆకస్మిక తనిఖీ
గంగవరం /రంపచోడవరం, పెన్ పవర్, సెప్టెంబర్ 28:
విద్యార్థులకు అందించే విద్యాబోధనలో ఎలాంటి రాజీ లేకుండా నాణ్యమైన విద్యను అందించాలని రాష్ట్ర ఎస్టీ సంక్షేమ కమిటీ చైర్పర్సన్, రంపచోడవరం ఎమ్మెల్యే మిరియాల శిరీషాదేవి సూచించారు. విద్యార్థుల భవిష్యత్తుకు పునాది వేసే పాఠశాల విద్యపై ఉపాధ్యాయులు ప్రత్యేక శ్రద్ధ వహించాలని ఆమె అన్నారు.
రంపచోడవరం మండల కేంద్రంలోని ప్రభుత్వ ప్రాథమిక పాఠశాలను ఎమ్మెల్యే మిరియాల శిరీషాదేవి సోమవారం ఆకస్మికంగా తనిఖీ చేశారు. ఈ సందర్భంగా పాఠశాలలో విద్యార్థులతో కొద్దిసేపు ముచ్చటించి వారి విద్యాభ్యాసం, పాఠశాలలో అందుతున్న సౌకర్యాలపై వివరాలు అడిగి తెలుసుకున్నారు. ఉపాధ్యాయులు క్రమం తప్పకుండా పాఠశాలకు హాజరవుతున్నారా, సక్రమంగా పాఠాలు బోధిస్తున్నారా, విద్యార్థులకు మధ్యాహ్న భోజనం అందుతున్నదా అనే విషయాలను స్వయంగా విద్యార్థులను ప్రశ్నించి తెలుసుకున్నారు. విద్యార్థులు ఇచ్చిన సమాధానాలపై ఎమ్మెల్యే సంతృప్తి వ్యక్తం చేశారు.
అనంతరం పాఠశాల వంటశాలను పరిశీలించిన ఆమె విద్యార్థులకు అందించే మధ్యాహ్న భోజనంపై పలు సూచనలు చేశారు. ప్రభుత్వం నిర్దేశించిన ఆహార మెనూను ఎలాంటి మార్పులు లేకుండా అమలు చేయాలని, విద్యార్థులకు నాణ్యమైన, పౌష్టికాహారం అందేలా చర్యలు తీసుకోవాలని సూచించారు. వంటశాల పరిసరాలను పరిశుభ్రంగా ఉంచాలని, ఆహారం తయారీలో పరిశుభ్రతా ప్రమాణాలను తప్పనిసరిగా పాటించాలని తెలిపారు.
విద్యార్థులకు ప్రభుత్వం కల్పిస్తున్న విద్య, మౌలిక వసతులు పూర్తిస్థాయిలో అందేలా సంబంధిత సిబ్బంది చర్యలు తీసుకోవాలని ఎమ్మెల్యే అన్నారు. పాఠశాలలో విద్యార్థులకు గానీ, సిబ్బందికి గానీ ఏవైనా సమస్యలు, ఇబ్బందులు ఉంటే తన దృష్టికి నేరుగా తీసుకురావాలని సూచించారు. విద్యార్థుల సంక్షేమం, విద్యా ప్రమాణాల మెరుగుదలకు అవసరమైన చర్యలు తీసుకునేందుకు తాను అందుబాటులో ఉంటానని తెలిపారు.
ఈ కార్యక్రమంలో వైద్య ఆరోగ్య శాఖ సిబ్బంది, పాఠశాల ఉపాధ్యాయులు, సిబ్బంది తదితరులు పాల్గొన్నారు.
