- పూసపాటి వారసత్వానికి కోలగట్ల సవాల్..
- 2029 ఎన్నికల్లో విజయనగరంలో మహిళా నేతల మధ్య ఆసక్తికర పోటీ?
- విజయనగరంలో పూసపాటి కుటుంబ రాజకీయ వారసత్వం
- 2024 విజయంతో అదితి గజపతిరాజు పునరాగమనం
- డిప్యూటీ మేయర్ నుంచి ఎమ్మెల్యే రేసులోకి కోలగట్ల శ్రావణి?
- వైసీపీ వ్యూహంలో కొత్త తరం నాయకత్వానికి ప్రాధాన్యం
- సామాజిక సమీకరణాలే ఎన్నికల ఫలితాలను నిర్ణయిస్తాయా?
విజయనగరం రాజకీయాలు మరోసారి వారసత్వ పోరుకు వేదిక కాబోతున్నాయా? పూసపాటి కుటుంబ వారసురాలు అదితి గజపతిరాజుకు ఎదురుగా కోలగట్ల వీరభద్రస్వామి కుమార్తె శ్రావణి బరిలోకి దిగనున్నారన్న ప్రచారం జిల్లా రాజకీయాల్లో ఆసక్తిని రేకెత్తిస్తోంది.
విజయనగరం, పెన్ పవర్, జూన్ 25 :
విజయనగరం జిల్లా రాజకీయాలకు ప్రత్యేక చరిత్ర ఉంది. రాజరిక వ్యవస్థ నుంచి ప్రజాస్వామ్య వ్యవస్థ వరకు పూసపాటి కుటుంబ ప్రభావం ఈ నేలపై చెరగని ముద్ర వేసింది. పీవీజీ రాజు నుంచి అశోక్ గజపతిరాజు వరకు పూసపాటి కుటుంబానికి ప్రజలు విశేష ఆదరణ చూపించారు. ఇప్పుడు అదే రాజకీయ వేదికపై మరో వారసత్వ పోరుకు రంగం సిద్ధమవుతోందన్న చర్చ జోరుగా సాగుతోంది. 2029 ఎన్నికల్లో పూసపాటి కుటుంబ వారసురాలు అదితి గజపతిరాజుకు ఎదురుగా వైసీపీ నేత కోలగట్ల వీరభద్రస్వామి కుమార్తె కోలగట్ల శ్రావణి బరిలోకి దిగవచ్చన్న ప్రచారం రాజకీయ వర్గాల్లో ఆసక్తిని పెంచుతోంది.
పూసపాటి కుటుంబ రాజకీయ వారసత్వం : విజయనగరం అసెంబ్లీ నియోజకవర్గంలో పూసపాటి కుటుంబం దశాబ్దాలుగా కీలక రాజకీయ శక్తిగా కొనసాగుతోంది. అశోక్ గజపతిరాజు 1978 నుంచి 2009 వరకు ఎనిమిది సార్లు ఎన్నికల బరిలోకి దిగగా, ఏడు సార్లు విజయం సాధించి రాష్ట్ర రాజకీయాల్లో ప్రత్యేక స్థానాన్ని సంపాదించారు. మంత్రిగా, కేంద్ర మంత్రిగా సేవలందించిన అశోక్ గజపతిరాజు ప్రస్తుతం గోవా గవర్నర్గా బాధ్యతలు నిర్వర్తిస్తున్నారు.
అదితి గజపతిరాజు రాజకీయ ప్రయాణం : తండ్రి రాజకీయ వారసత్వాన్ని కొనసాగిస్తూ అదితి గజపతిరాజు రాజకీయాల్లోకి ప్రవేశించారు. 2019లో కోలగట్ల వీరభద్రస్వామి చేతిలో ఓటమి పాలైన ఆమె, 2024 ఎన్నికల్లో తిరిగి విజయం సాధించి తన రాజకీయ పునరాగమనాన్ని నమోదు చేశారు. అయితే, ప్రజలతో మరింత మమేకం కావాల్సిన అవసరం ఉందన్న అభిప్రాయం పార్టీ వర్గాల్లో వినిపిస్తోంది. కొందరు నేతలపైనే ఎక్కువగా ఆధారపడుతున్నారన్న విమర్శలు కూడా అప్పుడప్పుడూ వినిపిస్తున్నాయి.
రాజకీయాల్లో చురుకుగా కోలగట్ల శ్రావణి : కోలగట్ల వీరభద్రస్వామి కుమార్తె శ్రావణి ఇప్పటికే రాజకీయాల్లో తనకంటూ ప్రత్యేక గుర్తింపు తెచ్చుకున్నారు. విజయనగరం మున్సిపల్ కార్పొరేషన్ డిప్యూటీ మేయర్గా పనిచేసిన అనుభవం ఆమెకు ఉంది. వైసీపీ కార్యక్రమాల్లో చురుకుగా పాల్గొంటూ పార్టీ కేడర్తో సత్సంబంధాలు కొనసాగిస్తున్నారు. దీంతో 2029 ఎన్నికలకు ఇప్పటి నుంచే ఆమెను సిద్ధం చేస్తున్నారన్న ప్రచారం జోరుగా సాగుతోంది.
వైసీపీకి విజయనగరంలో బలమైన సామాజిక సమీకరణాలు : విజయనగరం నియోజకవర్గంలో వైసీపీకి గణనీయమైన ఓటు బ్యాంకు ఉంది. కోలగట్ల కుటుంబానికి చెందిన సామాజిక వర్గ ప్రభావం కూడా ఎన్నికల్లో కీలకంగా మారే అవకాశం ఉందని రాజకీయ విశ్లేషకులు అభిప్రాయపడుతున్నారు. ఈ నేపథ్యంలో కోలగట్ల వీరభద్రస్వామి తన రాజకీయ వారసత్వాన్ని కుమార్తె ద్వారా కొనసాగించాలనే ఆలోచనలో ఉన్నట్లు పార్టీ వర్గాలు చెబుతున్నాయి.
మహిళా నాయకుల మధ్య ఆసక్తికర పోరు? : 2029 ఎన్నికల నాటికి విజయనగరం రాజకీయాల్లో మహిళా నాయకుల మధ్య ఆసక్తికర పోటీ జరిగే అవకాశాలు కనిపిస్తున్నాయి. ఒకవైపు పూసపాటి కుటుంబ వారసురాలు అదితి గజపతిరాజు, మరోవైపు కోలగట్ల కుటుంబ వారసురాలు శ్రావణి. ఈ పోరు కేవలం రెండు పార్టీల మధ్య కాకుండా రెండు రాజకీయ కుటుంబాల ప్రతిష్ఠాత్మక పోరుగా మారే అవకాశముందని రాజకీయ వర్గాలు అంచనా వేస్తున్నాయి.
