ప్రజా సమస్యల పరిష్కార వేదికకు 126 వినతులు
అర్జీలపై అదే రోజు స్పందించి పరిష్కార చర్యలు చేపట్టాలి
జీవీఎంసీ కమిషనర్ కేతన్ గార్గ్ ఆదేశం
బ్యూరో రిపోర్ట్ పెన్ పవర్
విశాఖపట్నం, ఆగస్టు 10: జీవీఎంసీ పరిధిలో నిర్వహించిన రాష్ట్ర ప్రభుత్వ “ప్రజా సమస్యల పరిష్కార వేదిక” కార్యక్రమానికి మొత్తం 126 వినతులు, ఫిర్యాదులు అందినట్లు జీవీఎంసీ కమిషనర్ కేతన్ గార్గ్ తెలిపారు. సోమవారం జీవీఎంసీ ప్రధాన కార్యాలయంలోని సమావేశ మందిరంలో అదనపు కమిషనర్లు ఎస్.ఎస్. వర్మ, డి.వి. రమణమూర్తితో కలిసి ఆయన ప్రజా సమస్యల పరిష్కార వేదికను నిర్వహించారు.
ఈ సందర్భంగా కమిషనర్ మాట్లాడుతూ.. ప్రజలు సమర్పించిన అర్జీలను సంబంధిత అధికారులు వెంటనే పరిశీలించి, ఫిర్యాదుదారులతో సంప్రదించి నిర్ణీత సమయంలో పరిష్కరించాలని ఆదేశించారు. ప్రజలు ఒకే సమస్యపై ప్రతి వారం తిరిగి ఫిర్యాదు చేసే పరిస్థితి రాకుండా అధికారులు ప్రత్యేక దృష్టి సారించాలన్నారు.
జోన్ల వారీగా పరిశీలిస్తే భీమిలి మండల పరిధి విభాగానికి 1, మధురవాడ ప్రాంతానికి 14, తూర్పు ప్రాంతానికి 19, పశ్చిమ ప్రాంతానికి 9, ఉత్తర ప్రాంతానికి 33, దక్షిణ ప్రాంతానికి 13, పెందుర్తి ప్రాంతానికి 7, అగనంపూడి ప్రాంతానికి 2, గాజువాక ప్రాంతానికి 11, జీవీఎంసీ ప్రధాన కార్యాలయానికి 17 ఫిర్యాదులు అందాయి.
విభాగాల వారీగా ప్రాంతీయ పరిపాలన విభాగానికి 5, పరిపాలన మరియు ఖాతాల విభాగానికి 6, రెవెన్యూ విభాగానికి 12, ప్రజారోగ్య విభాగానికి 9, పట్టణ ప్రణాళిక విభాగానికి 65, ఇంజినీరింగ్ విభాగానికి 24, ఉప ప్రజారోగ్య విభాగానికి 2, పట్టణ పేదరిక నిర్మూలన విభాగానికి 3 ఫిర్యాదులు వచ్చినట్లు కమిషనర్ వెల్లడించారు.
పెండింగ్ ఫిర్యాదులపై ప్రత్యేక దృష్టి
పురమిత్ర, ప్రజా సమస్యల పరిష్కార వేదికలో నమోదైన ఫిర్యాదులు అధిక సంఖ్యలో పెండింగ్లో ఉన్నాయని, వాటిని అధికారులు వెంటనే పరిశీలించి పరిష్కరించాలని కేతన్ గార్గ్ సూచించారు. ప్రాంతీయ కమిషనర్లు, ప్రాంతీయ అధికారులు ప్రతిరోజూ మధ్యాహ్నం 3 గంటల నుంచి 5 గంటల వరకు కార్యాలయాల్లో ప్రజలకు అందుబాటులో ఉండాలని ఆదేశించారు.
ఈ కార్యక్రమంలో అమృత్ సంయుక్త సంచాలకులు డి. విజయభారతి, అదనపు కమిషనర్ పి. నల్లనయ్య, ప్రధాన ఇంజనీర్ పి.వి.వి. సత్యనారాయణ రాజు, డీసీఆర్ ఎస్. శ్రీనివాసరావు, ప్రధాన నగర ప్రణాళిక అధికారి ఏ. ప్రభాకరరావు, ప్రధాన వైద్యాధికారి డాక్టర్ ఈ.ఎన్.వి. నరేష్ కుమార్, పట్టణ పేదరిక నిర్మూలన ప్రాజెక్టు సంచాలకులు బి.వి. రమణ, ఖాతాల పరిశీలకులు సి. వాసుదేవరెడ్డి, పర్యవేక్షక ఇంజనీర్లు, నగర పశువైద్య అధికారి డాక్టర్ కిరణ్ కుమార్, పట్టణ పేదరిక నిర్మూలన ప్రాజెక్టు అధికారి పి. ప్రసన్నవాణి, జిల్లా పంచాయతీ అధికారి శాంతకుమారి, ఉప పోలీసు కమిషనర్లు, సహాయ పోలీసు కమిషనర్లు, జీవశాస్త్ర నిపుణులు సాంబమూర్తి, గణాంక అధికారి పి.డి.వి. ప్రసాద్, ఉప ప్రజారోగ్య అధికారి వాసుకి, పరిపాలనా అధికారి పద్మజతో పాటు వివిధ విభాగాల సూపరింటెండెంట్లు తదితరులు పాల్గొన్నారు.
