పారిశ్రామిక ప్రాంతం గాజువాకలో అసలు ఏమి జరుగుతుంది

📰 Generate e-Paper Clip

పల్లాతో కూటమి ప్రభుత్వానికి నూకలు చెల్లిపోనున్నాయా..?
గాజువాక బీసీ రోడ్డు విస్తరణలో గందరగోళం – టీడీపీ కేడర్‌లో అసంతృప్తి?
36… 33… 30 అడుగులు కాదు.. అసలు మాస్టర్ ప్లాన్ ఏది?
రోడ్డు విస్తరణలో ఏకరీతి లేకపోవడంపై తీవ్ర విమర్శలు
మాజీ ఎమ్మెల్యే బంధువు అడ్డంకితో ట్రాన్స్‌ఫార్మర్ తరలింపులో ప్రతిష్ఠంభన?
మూడు నెలలైనా పూర్తికాని పనులు.. వ్యాపారులు, ప్రజలు తీవ్ర ఇబ్బందులు
స్థానిక ఎన్నికలపై ప్రభావం చూపుతుందా..? అనే రాజకీయ చర్చ
విశాఖపట్నం: (స్టాఫ్ రిపోర్టర్ ) పెన్ పవర్ ,జూన్ 28
పారిశ్రామిక ప్రాంతం గాజువాక బీసీ రోడ్డు విస్తరణ పనులు ప్రస్తుతం రాజకీయ, పరిపాలనా వర్గాల్లో చర్చనీయాంశంగా మారాయి. మాస్టర్ ప్లాన్ ప్రకారం రోడ్డు విస్తరణ జరగడం లేదని, ఒకచోట 30 అడుగులు, మరోచోట 33 అడుగులు, ఇంకొన్ని ప్రాంతాల్లో 36 అడుగుల మేర పనులు చేపడుతున్నారని స్థానికులు ప్రశ్నిస్తున్నారు. దీనివల్ల పారదర్శకతపై అనుమానాలు వ్యక్తమవుతున్నాయి. స్థానికుల అభిప్రాయం ప్రకారం, రోడ్డు విశాలంగా ఉన్న ప్రాంతాల్లో 36 అడుగుల మేర భవనాలు తొలగిస్తుండగా, సమస్యాత్మక ప్రాంతాల్లో మాత్రం విస్తరణ తగ్గించడం వెనుక కారణాలేమిటని ప్రశ్నిస్తున్నారు. మాస్టర్ ప్లాన్ అమలులో ఒకే ప్రమాణం పాటించకుండా ప్రాంతాలవారీగా మార్పులు చేయడం వివాదానికి దారితీస్తోందని అంటున్నారు.
ట్రాన్స్‌ఫార్మర్ తొలగింపుపై ప్రతిష్ఠంభన:
బీసీ రోడ్డు విస్తరణలో సమస్యాత్మకంగా మారిన విద్యుత్ స్తంభాలు, ట్రాన్స్‌ఫార్మర్ తొలగింపు విషయంలో కూడా వివాదం నెలకొన్నట్లు ప్రచారం జరుగుతోంది. బీసీ రోడ్డు మొత్తం 36 అడుగుల మేర విస్తరణ చేపడితేనే ట్రాన్స్‌ఫార్మర్ తొలగిస్తానని మాజీ ఎమ్మెల్యే బంధువుగా ప్రచారంలో ఉన్న భవన యజమాని పట్టుదలగా ఉన్నారని స్థానికులు ఆరోపిస్తున్నారు. దీనిపై సంబంధిత అధికారులు అధికారికంగా స్పందించాల్సిన అవసరం ఉందని ప్రజలు కోరుతున్నారు.
మూడు నెలలైనా పూర్తికాని పనులు రోడ్డు తవ్వకాలు వేగంగా చేపట్టినప్పటికీ, కాలువలు, రోడ్డు నిర్మాణ పనులు మాత్రం నత్తనడకన సాగుతున్నాయని వ్యాపారులు ఆవేదన వ్యక్తం చేస్తున్నారు. మూడు నెలలు దాటినా పనులు పూర్తికాకపోవడంతో వ్యాపారులు, స్థానికులు, వాహనదారులు, పాదచారులు తీవ్ర ఇబ్బందులు పడుతున్నారని చెబుతున్నారు.
చిరు, మధ్యతరగతి వ్యాపారులకు భారంగా పనులు:
పనులు ఆలస్యం కావడంతో వ్యాపార సంస్థలకు కస్టమర్లు తగ్గిపోవడం, దుకాణాలకు చేరుకోవడం కష్టంగా మారడం, దుమ్ము, ట్రాఫిక్ సమస్యలు తీవ్రంగా ప్రభావం చూపుతున్నాయని వ్యాపారులు వాపోతున్నారు. ప్రభుత్వం అభివృద్ధి పేరుతో చేపడుతున్న పనులు జీవనోపాధిపై ప్రభావం చూపకూడదని వారు కోరుతున్నారు.
అధికార శాఖల మధ్య సమన్వయం లోపమా?
జీవీఎంసీ టౌన్ ప్లానింగ్, రోడ్లు–భవనాల శాఖ, ఇతర విభాగాల మధ్య సమన్వయం లేకపోవడం వల్ల పనులు ఆలస్యమవుతున్నాయనే విమర్శలు వినిపిస్తున్నాయి. ఒక శాఖ మరో శాఖపై బాధ్యత నెట్టడంతో ప్రజలకు సరైన సమాధానం దొరకడం లేదని స్థానికులు అంటున్నారు.పారదర్శకతపై ప్రశ్నలు ఆస్తి పన్నులు, వాణిజ్య పన్నులు గడువు దాటితే వడ్డీతో వసూలు చేసే అధికారులు, ప్రజలకు అవసరమైన మౌలిక సదుపాయాల పనుల్లో మాత్రం అదే వేగం ఎందుకు చూపడం లేదని స్థానికులు ప్రశ్నిస్తున్నారు. రోడ్డు విస్తరణలో ఒకే విధానాన్ని పాటించకుండా ప్రాంతాలవారీగా మార్పులు చేయడం వెనుక కారణాలను ప్రభుత్వం వెల్లడించాలని కోరుతున్నారు.
స్థానిక ఎన్నికలపై ప్రభావం?
గాజువాక పారిశ్రామిక ప్రాంతంలో రోడ్డు విస్తరణ పనులపై ప్రజల్లో పెరుగుతున్న అసంతృప్తి రానున్న స్థానిక సంస్థల ఎన్నికల్లో ప్రభావం చూపే అవకాశముందనే రాజకీయ విశ్లేషణలు వినిపిస్తున్నాయి. అయితే ఇది రాజకీయ వర్గాల అభిప్రాయం మాత్రమే; ఎన్నికల ఫలితాలపై ముందస్తు నిర్ధారణగా భావించరాదు.
అఖిలపక్ష కమిటీతో పరిశీలన చేయాలనే డిమాండ్:                                                                                                                                        బిసీ రోడ్డు విస్తరణ పనులపై అఖిలపక్ష శాసనసభ కమిటీతో ప్రత్యక్ష పరిశీలన నిర్వహించి, మాస్టర్ ప్లాన్ ప్రకారం పనులు జరుగుతున్నాయా లేదా అన్నది బహిరంగంగా వెల్లడించాలని స్థానికులు, వ్యాపారులు డిమాండ్ చేస్తున్నారు.