- రాజకీయ వివాదాలతో ఫోకస్లో సిద్ధార్థ్ రెడ్డి
- ఎన్నికల బరిలోకి బైరెడ్డి..?
- టీజీ భరత్తో ఢీ వెనుక రాజకీయ వ్యూహం
- వివాదాలతో రాజకీయ మైలేజీ సాధించే ప్రయత్నమా?
- టీజీ భరత్పై ఆరోపణలతో జిల్లాలో హాట్ టాపిక్
- నందికొట్కూరు పునర్విభజనపై బైరెడ్డి ఆశలు
- కర్నూలు అసెంబ్లీపై కూడా ఫోకస్ పెరిగిందా?
- పోలీసు కేసుల మధ్య వెనక్కి తగ్గని బైరెడ్డి
- 2029 ఎన్నికల బరిలోకి దిగేందుకు వ్యూహాత్మక అడుగులు
- వివాదాలతోనే రాజకీయ భవిష్యత్తుకు బాటలు వేసుకుంటున్న సిద్ధార్థ్ రెడ్డి
కర్నూలు రాజకీయాల్లో బైరెడ్డి సిద్ధార్థ్ రెడ్డి వేస్తున్న అడుగులు ఇప్పుడు చర్చనీయాంశంగా మారాయి. మంత్రి టీజీ భరత్పై వరుస ఆరోపణలు, పోలీసు కేసులు, బహిరంగ సవాళ్లతో ఆయన తన రాజకీయ ప్రస్థానాన్ని మరింత బలపరుచుకునే ప్రయత్నం చేస్తున్నారనే విశ్లేషణలు వినిపిస్తున్నాయి. వచ్చే ఎన్నికల్లో ప్రత్యక్ష రాజకీయాల్లోకి అడుగుపెట్టాలన్న లక్ష్యంతోనే బైరెడ్డి వివాదాలను రాజకీయ అవకాశాలుగా మలుచుకుంటున్నారనే అభిప్రాయం రాజకీయ వర్గాల్లో వ్యక్తమవుతోంది. నందికొట్కూరు లేదా కర్నూలు అసెంబ్లీ స్థానాలపై ఆయన దృష్టి కేంద్రీకరించినట్లు సంకేతాలు కనిపిస్తున్నాయి.
పొలిటికల్ బ్యూరో పెన్ పవర్ కర్నూలు, జూన్ 12:
కర్నూలు జిల్లా రాజకీయాల్లో బైరెడ్డి సిద్ధార్థ్ రెడ్డి పేరు మరోసారి చర్చనీయాంశంగా మారింది. గత కొద్ది వారాలుగా రాష్ట్ర రాజకీయాల్లో, ముఖ్యంగా కర్నూలు జిల్లాలో ఆయన చేస్తున్న రాజకీయ వ్యాఖ్యలు, మంత్రి టీజీ భరత్పై చేస్తున్న ఆరోపణలు పెద్ద ఎత్తున చర్చకు దారితీశాయి. రాజకీయ విశ్లేషకుల అభిప్రాయం ప్రకారం, బైరెడ్డి సిద్ధార్థ్ రెడ్డి వచ్చే ఎన్నికల్లో ప్రత్యక్షంగా పోటీ చేసే లక్ష్యంతోనే తన రాజకీయ వ్యూహాన్ని అమలు చేస్తున్నట్లు కనిపిస్తోంది. మంత్రి టీజీ భరత్పై అవినీతి, భూకబ్జాల ఆరోపణలు చేయడం ద్వారా బైరెడ్డి తన రాజకీయ ఉనికిని బలంగా చాటుకునే ప్రయత్నం చేశారు. ఈ ఆరోపణల నేపథ్యంలో నమోదైన పరువు నష్టం కేసులు, పోలీసు విచారణలు ఆయనకు రాజకీయంగా మరింత ప్రచారం తీసుకొచ్చాయని విశ్లేషకులు చెబుతున్నారు. సాధారణంగా ఇలాంటి వివాదాలు నాయకులను ఇబ్బందుల్లోకి నెడతాయి. అయితే బైరెడ్డి మాత్రం వాటినే రాజకీయ అవకాశాలుగా మార్చుకునే ప్రయత్నం చేస్తున్నట్లు కనిపిస్తోంది.
బైరెడ్డి సిద్ధార్థ్ రెడ్డి ఇప్పటి వరకు ప్రత్యక్ష ఎన్నికల్లో పోటీ చేయలేదు. అయితే 2019 ఎన్నికల్లో నందికొట్కూరు నియోజకవర్గంలో వైసీపీ విజయానికి ఆయన కీలక పాత్ర పోషించినట్లు పార్టీ వర్గాలు చెబుతుంటాయి. ప్రస్తుతం ఆ నియోజకవర్గం ఎస్సీ రిజర్వ్గా ఉండటంతో ఆయనకు పోటీ చేసే అవకాశం లేదు. కానీ భవిష్యత్తులో జరిగే నియోజకవర్గాల పునర్విభజనలో నందికొట్కూరు జనరల్ స్థానంగా మారితే అక్కడి నుంచే పోటీ చేయాలనే ఆలోచనలో ఉన్నట్లు సమాచారం. ఒకవేళ పునర్విభజనలో మార్పులు జరగకపోతే కర్నూలు అసెంబ్లీ నియోజకవర్గంపై ఆయన దృష్టి సారించే అవకాశాలు ఉన్నాయని రాజకీయ వర్గాలు భావిస్తున్నాయి. ఇప్పటికే కర్నూలు నగర రాజకీయాలపై ఆయన ప్రత్యేక దృష్టి పెట్టినట్లు కనిపిస్తోంది. టీజీ భరత్తో నేరుగా రాజకీయ పోరాటానికి దిగడం కూడా అదే వ్యూహంలో భాగమనే అభిప్రాయం వ్యక్తమవుతోంది.
ఇటీవల ఒక ఫార్మా సంస్థ నుంచి మంత్రి టీజీ భరత్ రూ.45 కోట్లు వసూలు చేశారని, భూకబ్జాలకు పాల్పడ్డారని బైరెడ్డి బహిరంగంగా ఆరోపించారు. ఈ వ్యాఖ్యలను తీవ్రంగా ఖండించిన టీజీ భరత్ తన పరువుకు భంగం కలిగించారని ఆరోపిస్తూ పోలీసులకు ఫిర్యాదు చేశారు. ఈ వ్యవహారంలో బైరెడ్డి పోలీసు విచారణకు కూడా హాజరయ్యారు. అయినప్పటికీ తాను చేసిన ఆరోపణలకు కట్టుబడి ఉన్నానని, ఎన్ని కేసులు వచ్చినా వెనక్కి తగ్గబోనని స్పష్టం చేశారు. రాజకీయంగా చూస్తే, ఈ పరిణామాలన్నీ బైరెడ్డి సిద్ధార్థ్ రెడ్డిని జిల్లాలో ప్రధాన చర్చాంశంగా నిలబెట్టాయి. అధికార పక్షంపై దూకుడు ప్రదర్శించడం ద్వారా ప్రత్యామ్నాయ నాయకుడిగా ఎదగాలన్న ప్రయత్నం చేస్తున్నారనే అభిప్రాయం బలపడుతోంది. వివాదాల ద్వారా ప్రజల దృష్టిని ఆకర్షించి, ఆ తరువాత ఎన్నికల బరిలోకి దిగడం అనేది ఆయన వ్యూహంగా కనిపిస్తోంది.
ప్రస్తుతం చూస్తే బైరెడ్డి అనుకున్న రాజకీయ మైలేజీ సాధించారనే చెప్పాలి. అయితే ఈ ప్రచారం ఓట్లుగా మారుతుందా? వివాదాల రాజకీయాలు ఎన్నికల విజయానికి దారి తీస్తాయా? అనే ప్రశ్నలకు సమాధానం మాత్రం రానున్న ఎన్నికల్లోనే తేలనుంది.
