ఇరాన్లో కూలిన అమెరికా యుద్ధవిమాన సిబ్బందిని రక్షించే ఆపరేషన్పై తీవ్ర వివాదం నెలకొంది. ఒక సి-130 విమానం, రెండు బ్లాక్ హాక్ హెలికాప్టర్లను కూల్చివేశామని ఇరాన్ ప్రకటించింది. అయితే మిస్సైన పైలట్ను సురక్షితంగా రక్షించామని అమెరికా అధ్యక్షుడు డొనాల్డ్ ట్రంప్ వెల్లడించారు. ఈ ఆపరేషన్లో ఐదుగురు మరణించారని ఇరాన్ మీడియా పేర్కొంది. పశ్చిమాసియాలో యుద్ధ ఉద్రిక్తతలను మరింత పెంచే పరిణామంగా ఇది మారింది.
- ఇరాన్లో అమెరికా రెస్క్యూ ఆపరేషన్పై వివాదం..
- రెస్క్యూ మిషన్ విఫలమైందన్న ఇరాన్ వాదన
- సి-130, బ్లాక్ హాక్లను కూల్చివేశామన్న టెహ్రాన్
- పైలట్ సురక్షితంగా బయటపడ్డాడన్న ట్రంప్
- ఇస్ఫహాన్ దక్షిణంలో హైటెన్షన్ ఆపరేషన్
- అమెరికా-ఇరాన్ ఘర్షణలకు కొత్త మలుపు
న్యూస్ డెస్క్ | పెన్ పవర్ | ఏప్రిల్ 05:
ఇరాన్లో కూలిపోయిన అమెరికా ఎఫ్-15ఈ యుద్ధవిమాన సిబ్బందిని రక్షించేందుకు అమెరికా చేపట్టిన సాహసోపేత ఆపరేషన్పై పరస్పర విరుద్ధ ప్రకటనలు వెలువడ్డాయి. ఇస్ఫహాన్ దక్షిణ ప్రాంతంలో జరిగిన ఈ మిషన్ సందర్భంగా ఒక అమెరికా సి-130 మిలిటరీ ట్రాన్స్పోర్ట్ విమానం, రెండు బ్లాక్ హాక్ హెలికాప్టర్లను తమ బలగాలు కూల్చివేశాయని ఇరాన్ సంయుక్త సాయుధ దళాల కమాండ్ ప్రకటించింది. కనీసం ఐదుగురు మరణించినట్లు కూడా ఇరాన్ మీడియా తెలిపింది. అదే సమయంలో అమెరికా అధ్యక్షుడు డొనాల్డ్ ట్రంప్ మాత్రం మిస్సైన పైలట్ను అత్యంత సాహసోపేత చర్యలతో సురక్షితంగా రక్షించామని తెలిపారు. శత్రు భూభాగంలో రెండు రోజులపాటు కొనసాగిన ఈ సెర్చ్ అండ్ రెస్క్యూ ఆపరేషన్ అమెరికా సైనిక చరిత్రలోనే అత్యంత ధైర్యవంతమైన మిషన్లలో ఒకటిగా ఆయన అభివర్ణించారు. పైలట్ గాయపడినప్పటికీ ప్రస్తుతం సురక్షితంగా ఉన్నాడని చెప్పారు. ఈ ఆపరేషన్లో డజన్ల కొద్దీ విమానాలు, వందలాది ప్రత్యేక దళ సిబ్బంది పాల్గొన్నట్లు తెలుస్తోంది. ఇరాన్ మాత్రం అమెరికా “రక్షణ మిషన్” పూర్తిగా విఫలమైందని, కూల్చివేసిన విమానాల దృశ్యాలు తమ వద్ద ఉన్నాయని చెబుతోంది. కొన్ని అంతర్జాతీయ వర్గాలు మాత్రం కొన్ని విమానాలను అమెరికానే శత్రు చేతుల్లో పడకుండా స్వయంగా ధ్వంసం చేసి ఉండవచ్చని విశ్లేషిస్తున్నాయి. ఈ పరిణామం అమెరికా-ఇరాన్ మధ్య కొనసాగుతున్న సైనిక ఉద్రిక్తతలకు మరింత ఆజ్యం పోసే అవకాశముంది.
