జగన్ ఇంటి ముందు హైడ్రామా… వైసీపీలో కొత్త చర్చకు తెర..!
సజ్జలపై సంచలన ఆరోపణలు… అధినేతను కలవనీయలేదంటూ బైఠాయింపు..!
పార్టీలో అసంతృప్తా..? లేక అంతర్గత విభేదాల బహిర్గతమా..?
గుంటూరు, పెన్ పవర్, ఆగస్టు 5:
వైఎస్సార్ కాంగ్రెస్ పార్టీలో అంతర్గత అసంతృప్తి ఉందా..? లేక కొందరు నేతల వ్యవహారశైలిపై క్షేత్రస్థాయిలో అసహనం పెరుగుతోందా..? మాజీ ముఖ్యమంత్రి వైఎస్ జగన్మోహన్ రెడ్డి తాడేపల్లి నివాసం ముందు వైసీపీ సానుభూతిపరుడిగా గుర్తింపు పొందిన బోరుగడ్డ అనిల్ కుమార్ చేపట్టిన ఆకస్మిక నిరసన ఈ ప్రశ్నలను రాజకీయ వర్గాల్లో తెరపైకి తీసుకొచ్చింది.
బుధవారం తన భార్యతో కలిసి తాడేపల్లిలోని జగన్ నివాసం, పార్టీ కేంద్ర కార్యాలయం వద్దకు చేరుకున్న బోరుగడ్డ అనిల్ కుమార్, తనను పార్టీ కార్యాలయంలోకి అనుమతించడం లేదంటూ నిరసన వ్యక్తం చేశారు. పార్టీ అధినేతను కలిసే అవకాశం కూడా కల్పించడం లేదని ఆరోపిస్తూ అక్కడే బైఠాయించడం రాజకీయంగా చర్చనీయాంశమైంది.
ఈ సందర్భంగా పార్టీ ప్రధాన కార్యదర్శి, మాజీ ప్రభుత్వ సలహాదారు సజ్జల రామకృష్ణారెడ్డిపై బోరుగడ్డ తీవ్ర ఆరోపణలు చేశారు. తాను జగన్ అభిమానిగా పార్టీ కోసం పనిచేశానని, అనేక ఇబ్బందులు ఎదుర్కొన్నప్పటికీ ఇప్పుడు కనీస గౌరవం కూడా దక్కడం లేదని ఆవేదన వ్యక్తం చేశారు. జగన్ కోసం పనిచేసిన కారణంగా తనపై 22 కేసులు నమోదయ్యాయని, తన వ్యాపారాలు దెబ్బతిన్నాయని కూడా ఆయన ఆరోపించారు.
తనను పార్టీకి దూరం చేసే ప్రయత్నం జరుగుతోందని, సజ్జల రామకృష్ణారెడ్డి చుట్టూ ఉన్న వర్గమే తనపై రౌడీషీటర్ అనే ముద్ర వేస్తోందని బోరుగడ్డ ఆరోపించారు. తనపై రౌడీషీట్ లేదని హైకోర్టు పేర్కొన్నప్పటికీ, పార్టీ అధికార ప్రతినిధి కారుమూరి వెంకట్ రెడ్డి ఇప్పటికీ అదే ప్రచారం చేస్తున్నారని చెప్పారు. ఈ ఆరోపణలకు మద్దతుగా గతంలో జరిగిన ఫోన్ సంభాషణకు సంబంధించిన ఆడియోను కూడా మీడియాకు వినిపించారు.
తాను పార్టీ కోసం పనిచేస్తూ తొమ్మిది నెలలు జైలులో ఉన్నానని, కేసులు ఎదుర్కొన్నానని, అయినప్పటికీ పార్టీ కార్యాలయంలోకి కూడా అనుమతించకపోవడం బాధాకరమని బోరుగడ్డ అన్నారు. దళితుల పట్ల గౌరవం గురించి మాట్లాడే జగన్ ఈ అంశంలో వ్యక్తిగతంగా జోక్యం చేసుకోవాలని కోరారు. తమకు నాయకుడు జగన్ మాత్రమేనని, మరెవరూ కాదని స్పష్టం చేశారు.
పార్టీ కార్యాలయానికి రమ్మని పిలిచి గంటల తరబడి వేచి పెట్టినా చివరకు జగన్ను కలిసే అవకాశం ఇవ్వలేదని ఆయన ఆరోపించారు. తన ఆవేదన అధినేత దృష్టికి చేరడం లేదని, మధ్యలోనే అడ్డంకులు సృష్టిస్తున్నారని పేర్కొన్నారు.
బోరుగడ్డ నిరసనతో తాడేపల్లి పరిసరాల్లో కొద్దిసేపు ఉద్రిక్త వాతావరణం నెలకొంది. ఆయన చేసిన వ్యాఖ్యలు, ముఖ్యంగా సజ్జల రామకృష్ణారెడ్డిపై చేసిన ఆరోపణలు రాజకీయ వర్గాల్లో విస్తృత చర్చకు దారితీశాయి. పార్టీలో జగన్ తర్వాత కీలక స్థానంలో ఉన్న నాయకుడిపై బహిరంగంగా ఈ స్థాయిలో విమర్శలు రావడం వైసీపీలో అంతర్గత పరిస్థితులపై కొత్త ప్రశ్నలను లేవనెత్తుతోంది.
రాజకీయంగా చూస్తే బోరుగడ్డ అనిల్ పేరు గత కొన్నేళ్లుగా వివాదాలకు దూరంగా లేదు. వైసీపీ అధికారంలో ఉన్న సమయంలో సోషల్ మీడియాలో ప్రత్యర్థి పార్టీలపై తీవ్రస్థాయిలో వ్యాఖ్యలు చేస్తూ తరచూ వార్తల్లో నిలిచారు. ఆ వ్యాఖ్యలు పార్టీకి రాజకీయంగా ప్రయోజనం కంటే నష్టమే ఎక్కువ చేశాయనే విమర్శలు అప్పట్లోనే వినిపించాయి.
కూటమి ప్రభుత్వం అధికారంలోకి వచ్చిన అనంతరం బోరుగడ్డపై పలు కేసులు నమోదయ్యాయి. ఆయన కొంతకాలం జైలులో ఉండగా, విడుదల తర్వాత సోషల్ మీడియాకు దూరంగా ఉన్నారు. అలాంటి పరిస్థితుల్లో ఇప్పుడు నేరుగా జగన్ నివాసం వద్దకు వచ్చి నిరసన చేపట్టడం రాజకీయంగా ప్రాధాన్యం సంతరించుకుంది.
ఈ నిరసన వెనుక అసలు కారణం ఏమిటి? నిజంగా పార్టీ వ్యవహారశైలిపై అసంతృప్తేనా? లేక కొందరు నాయకుల వైఖరిపై వ్యక్తిగత నిరసనా? లేదా పార్టీలో తనకు మళ్లీ స్థానం కల్పించాలనే ప్రయత్నమా? అన్న ప్రశ్నలు రాజకీయ వర్గాల్లో చర్చనీయాంశంగా మారాయి.
అయితే బోరుగడ్డ చేసిన ఆరోపణలపై వైఎస్సార్ కాంగ్రెస్ పార్టీ లేదా సజ్జల రామకృష్ణారెడ్డి నుంచి అధికారిక స్పందన రావాల్సి ఉంది. ఆ స్పందన అనంతరం ఈ వ్యవహారంపై మరింత స్పష్టత వచ్చే అవకాశం ఉందని రాజకీయ పరిశీలకులు భావిస్తున్నారు. ప్రస్తుతం మాత్రం తాడేపల్లిలో చోటుచేసుకున్న ఈ పరిణామం వైసీపీ అంతర్గత రాజకీయాలపై కొత్త చర్చకు తెరలేపిందనే అభిప్రాయం వ్యక్తమవుతోంది.
